LlGC Llsgr. Peniarth 11 – tudalen 46r

arnaf dy dwyn odyma. A unbennes heb ynteu mi a|debygaf

pei ranghei vod y|m arglỽyd j vy mynet odyma. mi a|deby+

gỽn yr|aỽn. ac ny mynnỽn inheu vy mynet odyma ony bei

trỽy y ewyỻys ef. Taỽ am hynny beỻach heb hi. a|vỽyteeist di

dim hediỽ. Nado heb ynteu dim o vỽyt y byt yma. namyn

ef a|doeth yma wr mỽyn yr|hỽnn a|dywaỽt ỽrthyf lawer o ba+

rableu da. hyt na|m taỽr i y ỽrth dim o|r bỽyt hyt tra|del ˄cof ym ef.

A|wdost di heb hi pa vn oed ef. Nigromaỽnswr oed yr hỽnn

a|wnaei o|r vn parabyl deudec heb dywedut vn geir gỽir vyth.

ac o|r credy di idaỽ efo nyt aey di odyma vyth yny vych varỽ o

newyn. neu ynteu yny darffo y vỽystuileit dy lad. a|thi a|eỻy

wybot hynny yn|wir. kanys yd ỽyt ti yma yr ys dỽy nos a|di+

warnaỽt ac a|aeth o|r dyd hediw ymeith. ac nyt anuones y neb

yd|ỽyt ti yn galỽ arnaỽ dim o|r bỽyt ytt. a jaỽn maỽr yỽ o|th goỻ+

ir di yma. A|vnbennes heb ynteu pa|vn ỽyt ti pan vych yn

kynnic ym vyn|dỽyn odyma. Arglỽyd heb hitheu morwyn

gyuoethaỽc oedỽn gynt pan y|m|didreftatwyt ar gam. Ae ve+

ỻy heb ynteu y gỽnaethpỽyt a|thi. myn duỽ heb ef drỽc y gỽna+

ethpỽyt a|thi. A|pha|delỽ y coỻeist di tref dy dat. Gynt yr oedỽn

heb hi yn gỽassanaethu gỽr kyuoethockaf o|r byt oỻ. a minneu

kyn|decket oedỽn ac nat oed yn|y byt oỻ  dyn kyn|decket a|mi.

yny yttoed paỽb yn ryuedu vyn tegỽch ac ueỻy yd oedỽn in+

neu heb petruster. ac am y tegỽch hỽnnỽ mi a velcheeis

yn vỽy noc y|dylyassỽn. ac a|dywedeis ryỽ ymadraỽd yr|hỽnn

ny renghis bod y|m arglỽyd. ac yr aỽr y kigleu ynteu y pa+

rabyl ef a|lidyaỽd ỽrthyf yn gymeint ac na|m diodefaỽd yn|y

gedymdeithyas.