LlGC Llsgr. Peniarth 190 – tudalen 189
Ymborth yr Enaid
189
lỽer ỽynt yn wrychyon. nyt ynt lei no|r kỽ+
byldan y rannỽyt o·honaỽ. Sef yỽ hỽnnỽ
yr yspryt glan. Ac nyt ỻei hỽnnỽ e|hỽn*
noc vnolder y teir person ygyt. Yr|anỽ+
ylserch garyat hỽnnỽ a wahenir yn dỽy
geing. vn yỽ karu duỽ yn vỽy no phob
rỽy* beth. a charu dy gyfnessaf yn gyme+
int a|thi dy hun. Yr eil yỽ karu duỽ yn vỽy
no phop ryỽ·beth a|dylyir o bedeir fford
nyt amgen. O hoỻ gaỻon. a hoỻ eneit. a
hoỻ nerth. a|hoỻ vedỽl. Sef yỽ hynny yn
doeth. hyt na bo neb·ryỽ beth yn|y gaỻon
a|wrthỽynepo y garyat ef. namyn rodi
idaỽ ef yr hoỻ gaỻon. kanys ef e|hun
yssyd yn|y herchi. pan|dyweit. vy mab.
moes ym dy gaỻon. Sef yỽ hynny hoỻ
ewyỻys y gaỻon. hyt na bo gỽaet yn|y
gaỻon ar ny|s goỻynger o|e garyat ef
o|r byd reit. O hoỻ eneit. Sef yỽ hynny.
yn ber·velys. neu yn velyster. hyt na bo
digrifỽch na pher·velyster yn|yr eneit. na+
myn
| « p 188 | p 190 » |