LlGC Llsgr. Peniarth 190 – tudalen 253
Penityas
253
wassanaeth yr ỻes. Ony chanhorthỽyaỽd y
rei eissywedic. ac yn|bennaf o|e blỽyf e|hun
yn amser anghenreit. ac o·ny wnaeth tru+
gared a|r rei truein. O threulaỽd y da ỽrth
groessannyeit a hudolyon. neu yn|y ryỽ be+
theu hynny. am lythineb.
O Geingeu glythineb. O|r bỽytaaỽd
kynn aỽr dylyedus ac yn bennaf yn
unprytdydyeu gossodedic y gan yr eglỽys.
Ony chynhalyaỽd ef yr vnprytyeu gossodedic.
neu a orchymynnit idaỽ. O cheissyaỽd ym+
digrifhau yn ormod o amylder ac amry+
uael bỽydeu a diodyd. O gnottaaỽd vỽyta
neu yfet yn ry chỽannaỽc neu yn ry
reibyedic. ot aeth ef dros vessur o deuaỽt.
O|r keissyaỽd petheu ry vanweith neu ry
drut. O chwydaỽd. O|r bu uedỽ yn vynych.
O chỽydaỽd corff crist drỽy lythineb. O
pheris y ereiỻ drỽy valis neu orwac
clot bỽyta gormod neu yfet. O|r gỽnaeth
ỻedrat ym mwyt neu yn niaỽt o lythineb.
| « p 252 | p 254 » |