Llsgr. Bodorgan – tudalen 19
Llyfr Cyfnerth
19
Y Pengvastraut ar Penkynyd Ar troedaỽc
nyt eistedant ỽrth paret y neuad. paỽb oho ̷+
nunt eissoes a ỽyr y le. Bỽyt seic a chorne ̷+
it cỽrỽf a geiff yn| y ancỽyn.
Gỽastraỽt auỽyn a geiff kyfrỽyeu peunydy+
aỽl y brenhin ae suder ae panel ae ffrỽyn
ae hossaneu ae ysparduneu ae gapan glaỽ.
pan dirmyccer. Ef a dỽc y amỽs ae arueu yr
brenhin pan y mynho. Ef a deila march y
brenhin pan discynho a phan eskynno.
Ef a dỽc march y brenhin o|e lety ac y lety.
Ran gỽr a geiff o|r ebolyon anreith.
Medyc a eisted yn eil nessaf yr penteulu
yn| y neuad. yn rat y gỽna medeginyaeth
ỽrth y teulu a gỽyr y llys. kany cheiff gan ̷+
thunt eithyr y dillat a torho gan yr arueu
onyt vn o|r teir gỽeli agheuaỽl uyd. Punt
hagen a gymer ef heb y ymborth neu
naỽ vgeint ae ymborth o|r weli agheuaỽl.
nyt amgen no phan torher pen dyn hy ̷+
ny welher yr emenhyd. Neu pan wanher
dyn yn| y arch hyny weler y amyscar. neu
pan torher vn o petwar post corff dyn
hyny weler y mer. Sef rei ynt. y deu uordỽyt
| « p 18 | p 20 » |