LlB Llsgr. Cotton Titus D IX – tudalen 77v
Llyfr Blegywryd
77v
nyt amgen. no|thygu o|r|perchenn y|talh+
ei y|lỽdynn y|gỽerth a|wnnelei arnaỽ. ac
y|caffei yna yrdaỽ. Y|neb a|ỽertho moch
bit y·danunt rac y|vynnyglaỽc tri dieu
a|their nos. Rac yr hualaỽc tri mis. ac
nac yssont eu perchyll. ac os yssant.
atuerer trayan y|gỽerth. ac ny|dyly
hỽnnỽ eturyt y|moch. a bit dros y|dilys+
rỽyd vyth. O|R llad moch neb dyn. tal ̷+
et perchenn y|moch alanas ot|adef y ̷
moch. DRos vaed kenuein y|telir baed.
a|hỽch o|bop parth idaỽ. Gỽerth cath
a|ladher. neu a|dyccer letrat. y|phenn a
ossodir y waeret ar|laỽr gỽastat. a|e
lloscỽrnn y|vynnyd. a|e dala velly tra
vyrryher graỽn gỽenith ymdanei
hyny gudyho blaen y lloscỽrnn. a hyn+
ny vyd y|gỽerth. Onny cheffir y|gra ̷+
ỽn. dauat vlith. a|e hoen. a|e gỽlann.
a|tal. Os cath a|ỽarchattỽo yscubaỽr y
brenhin vyd. Gỽerth cath arall; ped+
eir keinnaỽc kyureith yỽ. Teithi
cath. a|phob llỽdynn ar|ny·d|ymbortho
dynyon ar|eu llaeth. trayan y gỽerth
vyd. neu werth y|thorllỽyth. Y neb a
wertho cath bit drosti na bo catheric
| « p 77r | p 78r » |