LlB Llsgr. Harley 958 – tudalen 48r
Llyfr Blegywryd
48r
heb etiued o|e gorff. neu gẏt·etiued hẏt
geifyn ẏ brenhin a vẏd etiued o|r tir hỽn+
nỽ. megẏs ẏ mae braỽt ẏn etiued dẏ+
lẏedaỽc o|e gỽadaỽl. trỽẏ ẏr hỽn ẏ kaffo
hi ỽr priaỽt dẏlẏedaỽc o|tir. nẏt amgen
ẏ|gan ẏ that. neu ẏ gan ẏ tiuedẏon. o|r
tric wrth gẏghor ẏ rẏeni a|e chẏt·etiued+
ẏon. Onẏ bẏd ẏ perchennaỽc tir etiued
arall namẏn merch. ẏ uerch a uẏd etiued
o|r tir. O|r bẏd ẏ perchennaỽc tir
etiued deduaỽl ac araỻ aneduaỽl heb ran.
O|r bẏd ẏ perchennaỽc tir etiued dianaf.
ac araỻ anafus. megẏs daỻ. neu vẏdar.
neu grupul. Ẏ|dianaf a vẏd etiued o|r tir
oỻ. na deduaỽl uo nac aneduaỽl. kanẏ dich+
aỽn neb anafus wneuthur ẏn gỽbẏl was+
sanaeth tir ẏ|r brenhin ẏn dadleueu a|ỻuẏ+
deu. Ac o bẏd ẏ|r etiued anafus hỽnnỽ eti+
ued dianaf hỽnnỽ a vẏd etiued o|e dẏlẏ+
et ef o tir. Pỽẏ bẏnhac a gymerho dẏlẏ+
et dẏn anafus o tir. prẏderu ẏr anafus
a oruẏd arnaỽ o uỽẏt a diỻat tra vo bẏỽ.
O |R gomed dẏn teir gwẏs o pleit bren+
hin am tir ac na del ẏ attep ẏ|r neb
a|e gouẏnho ẏr haỽlỽr a|dodir ẏ medẏant
ohonaỽ. Os o achaỽs kẏfreithaỽl ẏ|trẏgỽẏs
| « p 47v | p 48v » |