LlGC Llsgr. Llanstephan 27 (Llyfr Coch Talgarth) – tudalen 54r
Breuddwyd Pawl
54r
redoed da ry wnathoed. Ac yna y|duc mihangel yr eneit y
baradwys. ỻe yr oedynt yr engylyon yn erbynyeit y|r e+
neidyeu gỽirion. a gaỽr o lewenyd a|rodassant ual pet uei
yr heul a|r ỻoer a|r nef a|r daear yn kyffroi. Ac yna ỻefein
a|orugant y pechaduryeit o|r poeneu. a dywedut. Trugar+
haa ỽrthym vihangel archangel. a thitheu wynuydedic
baỽl ebostol eiryolỽch drossom ar duỽ. kanys ni a|wdam
panyỽ drỽy aỽch gỽedi chỽi y kynhelir y nef a|r daear. Wyl+
ỽch chỽitheu. a ninneu a|wylỽn y·gyt a|chỽi yny drugar+
hao duỽ ỽrthyỽch. ac yny rodo duỽ nodua yỽch. a ỻefein
a|oruc y niuer o|r poeneu. a ỻefein a|oruc mihangel a
phaỽl ebostol. a milyoed o engylyon y·gyt ac ỽynteu.
yny glywit y ỻef yn|y pedweryd nef yn dywedut. Arglỽ+
yd iessu grist. trugarhaa ỽrth veibyon y|dynyon. ac yna y
gỽelei paỽl y nef yn kyffroi. a|duỽ a|r goron am y benn.
a|r niuer a|oedynt yn uffern yn|gỽeidi. ac yn dywedut.
Trugarhaa ỽrthym uab duỽ byỽ goruchel. Ac yna y
clywei baỽl lef yn dywedut ỽrthunt. Paham na wnae+
thaỽch chỽi dim o|r|da ual y gaỻeỽch erchi bendith a
gorffowys. Myui a rodet ar y groc ac a|bỽywyt yr hoely+
on y|m|dwylaỽ. ac a|rodet y gỽenỽyn ym o|e yuet. ac a|m
gỽanpỽyt a|r|gỽaeỽ. ac a ymrodeis vy hun y angeu yr
aỽch bywyt chỽi. a chỽitheu geuaỽc uuaỽch a ỻadron ke+
bydyon. kynghoruynnus. balch. a distriỽ yr eglỽysseu ac
attal y degemeu. a phob amryuael drỽc heb wneuthur dim
da. nac unpryt nac alussen. Ac yna y gostyngaỽd mihang+
el archangel a phaỽl ebostol. a milyoed o engylyon geyr
| « p 53v | p 54v » |