LlGC Llsgr. Llanstephan 27 (Llyfr Coch Talgarth) – tudalen 85r
Mabinogi Iesu Grist
85r
a rodei ef y ueibyon ymdiueit a|r gỽraged gỽedwon a|r pere+
rinyon. a|r anghenogyon. a|r eil rann a rodei y|r rei a diwyỻ+
ynt duỽ. ac o|r|dryded rann ynteu a|e dylỽyth a ymborthynt
arnaỽ. Yn|y bymtheng mlỽyd y dechreuaỽd ef dỽyn y vuched
ual hynny. ac yn|yr vgeinuet vlỽydyn y kymerth ef wreic. an+
na oed y henỽ verch Jsachar o lin dauyd. ac ugein mlyned
y buant y·gyt heb gaffel plant. Dyd·gỽeith gỽyl yd oed
Joachim y·gyt a niuer a|oedynt yn gỽneuthur aberth y
duỽ. A phan yttoed Joachim yn arlỽyaỽ y anregyon ynteu
y duỽ y doeth attaỽ vn o hynafyeit y demyl. ruben y enỽ.
ac y dywaỽt ỽrthaỽ. nyt kannyat ytti sefyỻ yn|y demyl y
aberthu y duỽ. kanny vendigaỽd duỽ dydi o rodi plant
ytt yn|yr israel. ac yna kewilydyaỽ a|oruc Joachim yng
gỽyd y bobyl. ac enkilyaỽ o|r demyl ac ỽylaỽ. ac nyt ym+
choelut y ty a|wnaeth ef. namyn mynet att y ysgrybyl
a|oruc. a|dỽyn y·gyt ac ef y vugelyd y|r mynyded eithaf o|r
a|oed. ual na chlywei y wreic dim y ỽrthaỽ. a thra yttoed
hitheu yn wylaỽ yn|y gỽedi y dywaỽt ual hynn. Arglỽyd
heb hi kanny rodeist di y mi veibyon. paham y dugost
vyng|gỽr y gennyf. ỻyma bum mis yr pan weleis i. vyg
gỽr. ac na ỽnn pa du y bu uarỽ ual y gaỻỽn peri y gladu.
ac ual y|bydei hi ueỻy yn wylaỽ ac yn gỽediaỽ dyrchafel
y ỻygeit att yr arglỽyd a|wnaeth. a|hi a|welei ederyn yr e+
glỽys yn porthi y adar yn|y nyth a|r brenn a|elwir laỽr+
wyden. Hitheu yna a|vỽryaỽd ebỽch ar yr arglỽyd. ac a
dywaỽt. Arglỽyd duỽ hoỻgyuoethaỽc heb hi. ti a rodeist
y bop creadur y etiued. y|r aniueilyeit. y|r pryfet. y|r pysgaỽt.
| « p 84v | p 85v » |