LlGC Llsgr. 3035 (Mostyn 116) – tudalen 124r
Brut y Brenhinoedd
124r
Echel vrenhin denmarc A ỻeu vab kynuarch bren+
hin ỻychlyn Ac y| r petwared y rodet. hywel. Mab. emyr
ỻydaỽ a gỽalchmei. Mab. gỽyar deu nei y arthur Ac
yn ol y pedeir hyny y gossodet pedeir bydin ereiỻ. dra| y
kefyn ỽynteu Ac y| r gyntaf o| r rei hyny y rodet kei
pensỽydỽr a bedwyr bentruỻyat Ac y| r nessaf idi
hodlyn jarỻ ruthyn a gỽittart jarỻ peitaỽ Ac y| r
tryded owein o gaer ỻeon a jonathal o| gaer weir
Ac y| r petwared. vryen o gaer vadon a| chursalem
o gaer geint Ac arthur e| hun a etholes ỻeg idaỽ
o varchogyon a·ruaỽc o| whe gỽyr a wheugeint a
whechant a whe| mil. A rac bron arthur sefyỻ y
dreic eureit yr hon a oed yn ỻe arỽyd idaỽ. Megys
y geỻynt y gỽyr blin a| r rei brathedic pan ymgymheỻei
eu hagen vdunt fo dan yr arỽyd hỽnno* megys y| gasteỻ
A gỽedy ỻunyaethu paỽb yn| y ansaỽd [ diogel ~
arthur a dywaỽt val hyn ỽrth y varchogyon vyg
kyt·uarchogyon kytdiodefedic ym. chwi a wnaethaỽch
ynys. prydein. yn arglỽydes ar dec teyrnas ar hugein. y| aỽch deỽ+
red chỽi ac y aỽch molyant Y| kytdiolchaf inheu hyny. Y
molyant nyt yttyỽ yn paỻu nac yn difygyaỽ namyn
yn kynydu. kyt| ry| ffoch. i. ys| pump mlyned yn arueru o
seguryt heb arueru o arueu a milỽryaeth Yr hyny eis+
soes ny choỻyssaỽch aỽc anyanaỽl dayoni namyn yn
wastat parhau yn aỽch bonhedic dayoni. kanys y ru+
feinwyr a| gymeỻassaỽch ar fo Y| rei a| oed oc eu syber+
wyt yn keissaỽ dỽyn aỽch rydit y|genỽch Ac yn vỽy eu
nifer no| r einim ni Ac ny aỻassant sefyỻ yn aỽch erbyn
namyn yn dybryt fo gan achub y| dinas hỽn Ac ar | aỽr
hon y| doant o| hỽnỽ drỽy| y| dyfryn hỽn y gyrchu aỽfern.
| « p 123v | p 124v » |