LlGC Llsgr. 3035 (Mostyn 116) – tudalen 203v

Yr|af* rac·ỽyneb yd ymheolaỽd y|tyghetuen yn|y gỽrthỽyneb ac y

delit y brenhin y|gan y|sarasinyeit wedy ỻad robert y vraỽt ac

am·gylch deg mil ar|hugein o|r cristonogyon a|thros y eỻygdawt

eff a|e|hebrygyat ef a|e|wyr hyt yn acrys y goruu arnaỽ rodi duw

drachefyn y|r|sarasinyeit wedy hyny y|rodes duỽ idaỽ y vudugol+

yaeth y dial ar elynyon crist y|sarhaet kanys ef a anuones y deu

vroder hyt yn|freinc y|gynuỻaỽ nerth idaỽ o|sỽỻt a gỽyr aruaỽc

tra drickyei ynteu a|r vrenhines yn acrys ac odyna yd eniỻaỽd

eff dinas damiet gan lad aneiryf o|r sarasinyeit. ~ ~

D eg mlyned a deugein a deu cant a|mil oed oet crist pan vu

varỽ brenhin pry·dein wedy adaỽ y vn mab yn etiued idaỽ

Y|vlỽydyn rac·ỽyneb. y bu varỽ gỽladus du verch. ỻywelyn. ap joruerth. ac yn

niwed y vlỽydyn honno y bu varỽ Morgan ap yr arglỽyd rys yn

ystrat flur wedy kymryt abit creuyd ymdanaỽ. Y|vlỽydyn rac+

ỽyneb y bu gymeint gỽres yr heul ac y dissychaỽd yr hoỻ dayar

gantaỽ hyt na|thyfaỽd hayach dim frỽẏth ar y coet na|maes

ac na chahat pys·gaỽt mor nac afonyd ac yn diwed y kynhay+

af y vlỽydyn hono y bu gymeint y glaỽogyd ac y kudyaỽd y

ỻifdyfred ỽyneb y dayar hyt na aỻei ormod sychdỽr y|dayar

ỻyncu y dyfred ac y|ỻiffhaaỽd yr a·vonyd yny dorres y|pynt a|r

melineu a|r tei kyfagos y|r avonyd a chribdeilaỽ y|coedyd a|r

perỻaneu a gỽneuthur ỻawer o|goỻedeu ereiỻ yn yr haf. Y|vlỽydyn

hono y|duc gỽilim ap gỽrwaret y gỽr a oed synysgal y|r brenhin

ar tir mael·gỽn jeuanc drỽy orchẏmẏn y brenhin y ar wyr eluael

anreith am y|bot yn keissaỽ aruer o|porueyd maelenyd megys

o vreint. Y|vlỽydyn rac·ỽyneb y|mordyaỽd henri vrenhin y|vỽr+

deỽs a|diruaỽr ad lu gantaỽ a gorymun* y vrenhinyaeth a|wnaeth

y|etwart y vab a rickert jarỻ kernyỽ y vraỽt a|r vrenhines