LlGC Llsgr. 3035 (Mostyn 116) – tudalen 61r
Brut y Brenhinoedd
61r
tonogyon fydlaỽn oed vfyd darestygedic vdunt y·dan
wed mab duỽ. mal y kerdynt yn doruoed y|teyrnas
nef. Ac yna y damlywychỽys mab duỽ y drugared
hyt na mynei bot kenedyl y brytanyeit yn ỻychwin
o|tewyỻỽch pechodeu. namyn goleuhau o·nadunt e
hunein egluraf lampeu gleinẏon verthyri Ac yr aỽr
hon y|mae bedeu y|rei hẏnnẏ ac eu hescryrn Ac eu crei+
reu yn|y ỻeoed y|merthyrỽẏt yn gỽneuthur diruaỽr
wyrtheu a didanỽch y|r neb a edrychei arnadunt pei
na bei gỽynuanus ac ỽylofus y gristonogyon clybot
ry|wneuthur o estraỽn genedyl pa·ganyeit A|r fydlaỽn
gristonogyon ac eu priaỽt genedyl e|hunein y kyfryỽ
Ac ym|plith y bendigedigyon bobloed merthyri o|wyr
a gỽraged y|diodefỽys seint alban. Ac ygyt ac ef julius
ac aaron o gaer ỻion ar ỽysc. Ac yna y kymerth seint
alban amphibalus yd oedit aỽr py aỽr yn dỽyn o|e verth+
yru Ac y|kudyỽẏs yn|y ty e|hun. A gỽedy na thygei.
hẏnnẏ y|kymerth y|wisc ymdanaỽ e|hun ac yd ymrodes
y|merthyrolyaeth drostaỽ gan elewychu crist y gỽr a
rodes y eneit dros y defeit. Ac odyna y|deu ỽr ereiỻ drỽy
aneiryf boeneu ar eu corfforoed a eỻygỽyt y|wlat nef
drỽy verthyrolyaeth ~ ~ ~
A c odyna y kyfodes jarỻ kaer loyỽ yn erbyn asche+
piodotus a gỽedy ymlad ac ef. y|ỻadaỽd ac y|kyme+
reth e|hun coron y|teyrnas. A gỽedy clybot hẏnnẏ
yn sened rufein ỻawenhau a orugant o ageu y|brenhin
a gynhyruyssei eu harglỽydiaeth a gỽedy dỽyn ar gof
o·nadunt eu coỻet yr pan goỻassynt ar·glỽydiaeth
ynys brydein. Anuon a|orugant Constans senadỽr
y gỽr a weresgynassei yr yspaen ỽrth rufein. gỽr doeth
| « p 60v | p 61v » |