LlGC Llsgr. 3035 (Mostyn 116) – tudalen 81r
Brut y Brenhinoedd
81r
ef amgen no hỽnỽ. Ac anryfedu hyny yn vaỽr A|oruc
y brenhin Ac erchi dỽyn Meugant dewin attaỽ y ofyn
idaỽ a aỻei hẏnnẏ vot yn wir A gỽedy dyuot Meugant
y|r ỻe a datkanu idaỽ y gyfranc hono; ynteu a dywaỽt.
y keiff yn ỻyfreu y doethon. Ac yn ỻawer o istoriaeu bot
ỻawer o dynyon a|ryỽ anedigaetheu hyny vdunt. Apu+
lenius heb ef a dyweit pan draetho o|duỽ a|r seint bot
ryỽ genedyl o yspryt yn|pressỽylaỽ rỽg y ỻeuat a|r
dayar a|r rei hynẏ a alỽn. i diefyl gogỽydedit*. A ran
yndunt o|r dayar Ac o dynaỽl anyan. a|ran araỻ o
anyan egylẏon yn pressỽylaỽ. yno. A|phan y|mynont
y gaỻant kymrẏt furuf dynaỽl a|e drych arnadunt
A chytyaỽ a|r gỽraged veỻy. Ac attuyd vn o|r rei hẏnẏ
a doeth at y|wreicda hon Ac a|e beichoges pan gahat
y gỽas jeuanc hỽn. ~ ~ ~ ~
A c yna pan gigleu vyrdin yr ymadrodyon hyny. nes+
sau a oruc myrdin at y|brenhin ac a·doli idaỽ. a go+
fyn py achaỽs y ducsit ef a|e vam hyt yno. Gỽrth+
eyrn a dywaỽt ỽrthaỽ vyn dewinyon a archassant im
keissaỽ mab heb dat idaỽ. Ac a gỽaet hỽnnỽ iraỽ ẏ
gỽeith. Ac veỻy y|dywedynt y sefyỻ. Ac yna y dywaỽt
Myrdin. arglỽyd heb ef. par dỽyn dy dewinyon rac
vy|mron|i. A mi a|baraf ac a|brofaf arnunt vot yn gel+
wyd a dywedassant. Ac enryfedu a oruc y brenhin
ymadraỽd Myrdin a gỽedy dỽyn y dewinyon rac y
voron ef. ynteu a ofynỽys vdunt beth a oed yn ỻes+
teiraỽ y|r gỽeith sefyỻ. kanys y|mae yno peth yn
dirgel ny at y|r gỽeith sefyỻ Ac ny aỻỽys y de+
winyon atteb Ac yna y|dywaỽt Myrdin. Arglỽyd
heb ef arch|ti dỽyn dy weithwyr y gladu y|dayar yma.
| « p 80v | p 81v » |