LlGC Llsgr. 3036 (Mostyn 117) – tudalen 255
Brut y Brenhinoedd
255
gỽneuthur brenhin o·nadunt e| hun. A phan glyỽ+
her hynny yn eu gỽlat ỽynteu; yd ym·gynnullant
eu kenedyl. A thrỽy eu gnotaedic vrat y gorescynant
ni. Ac y distrywant an kenedyl hyt ar dim. kanys
kyneuodic yỽ ganthunt oc eu mebyt trỽy vrat a
thỽyll na chatwant na ffyd na chywirdeb ỽrth neb.
Ac ỽrth hynny arglỽyd iaỽnach oed inni heb ef eu
kywarsagu noc eu henrydedu. kanys pan etelis
gỽrtheyrn gỽrtheneu ỽynt yn gyntaf megys
y ymlad ygyt ac ef val guyr fydlaỽn tros y wlat
yn erbyn y elynyon. eissoes pan allassant ỽy gyn+
taf caffel lle ac amser; y dangossassant eu tỽyll ac
eu brat idaỽ. gan talu drỽc dros da. Ac y bredychys+
sant guyrda y teyrnas ac y lladassant ỽy o dywal
aerua. Ac odyna trỽy vrat y| guenỽynassant em+
reis wledic. A guedy hynny y bredychassant vth+
yr bendragon. A guedy hynny y| gỽnaethant vrat
arthur gan duunaỽ a medraỽt yn| y erbyn. Ac od+
yna y torrassant eu haruoll A cheredic vrenhin ac
y dugant gotmỽnt vrenhin yr affric ar y torr. A
thrỽy eu brat ỽy y diholet ef yn waradỽydus. Ac y
distryỽyt y| genedyl yn diuessur.
A Guedy dywedut o vreint hir yr ymadrody+
on hynny; ediuar uu gan gatwallaỽn wne+
uthur dadleu o|r achaỽs hỽnnỽ. Ac anuon a oruc
ar etwin y uenegi nat yttoed yn kaffel kyghor y
ganhyadu idaỽ yr hyn yd oed ef yn| y erchi. kanys
| « p 254 | p 256 » |