LlGC Llsgr. Peniarth 11 – tudalen 102v
Ystoriau Saint Greal
102v
yna y arueu a|ducpỽyt idaỽ. Ac yn|y ỻys yno y roespwyt march
idaỽ. A|gỽedy esgynnu ohonaỽ. ef a gymerth gennat y tylwyth.
ac a uarchockaaỽd drỽy yr estronyon wledyd. a diwarnaỽt ef a
lettyaỽd myỽn manachlaỽc wenn. yn|y ỻe y buwyt lawen wrth+
aỽ o achaỽs y vot yn varchaỽc urdaỽl anturyus. A|thrannoeth
y bore gỽedy gỽarandaỽ offeren ef a|edrychaỽd ar y tu deheu ac
a|arganuv bed newyd wneuthur. gỽedy y adurnaỽ yn anry+
dedus megys y gỽydyat ef ar y adurnyat panyỽ gỽr anrydedus
a gladyssit yno. a|ỻythyr eureit yngkylch y bed wedyr|wneuthur.
y|rei a|oedynt yn dywedut. yman y cladwyt brenhin bandyma+
gus o gỽreu. yr|hỽnn a|daruv y walchmei y lad. A|phan|weles
laỽnslot hynny ef a vu dost a|thrist ganthaỽ. kanys caryat ma+
ỽr a|oed y·ryngthaỽ ac ef. A phei araỻ o|r byt a|e ỻadyssei onyt
gỽalchmei. nyt aei y fford o|r byt onyt y angheu. A|e gỽynaỽ
yno a|oruc laỽnslot yn vaỽr. a|dywedut mae coỻet maỽr oed
y|r byt goỻi gỽr kystal ac ef. ac nat enniỻit vyth yn|ỻys arthur
y gyffelyb. y dyd hỽnnỽ y trigyaỽd ef yn|y vanachlaỽc honno
yr caryat ar y gỽr a gladyssit yno. yr hỽnn a|wnathoed idaỽ ef
lawer o enryded. A thrannoeth y bore gỽedy gỽisgaỽ y arueu
ef a|esgynnaỽd ar y varch. a thrỽy gennyat y brodyr ef a|aeth
ymeith. ac a|gerdaỽd y fford drỽy syỽrneioed megys y troes
y antur ef yny doeth y lys arthur yn|y ỻe y bu laỽen paỽb
ỽrthaỽ. ac yn damunaỽ y dyuotyat ef adref a|e gedymdeithyon.
o|r rei ny dathoedynt haeach adref. a|chymeint ac a|dathoed o+
honunt ny chaỽssoedynt dim oc yr oedynt yn|y geissyaỽ ~
Yma y|mae yr ymdidan yn tewi am laỽnslot. ac yn traethu o
[ alaath.
| « p 102r | p 103r » |