LlGC Llsgr. Peniarth 11 – tudalen 103r
Ystoriau Saint Greal
103r
T raethu y mae yr ymdidan yma panyỽ gỽedy mynet
galaath y|ỽrth laỽnslot y dat. marchogaeth o·honaỽ la+
wer o|diwarnodeu mal yd|oed y antur yn|y ganhebrỽng y|neiỻ
wers hỽnt. a|r ỻaỻ yman. yny doeth y vanachlaỽc yr|honn yr
oed moradrins vrenhin yndi. A|phan gigleu ef vot y gỽr da hỽn+
nỽ yno yn aros dyuotyat y marchaỽc da. ef a vedylyaỽd yr|ai
y ymwelet ac ef. Trannoeth y bore gỽedy offeren ef a|doeth y
ymwelet a|r brenhin. ac yr|aỽr y doeth ef. y brenhin yr hỽnn ny
welsei yr ys|ỻawer o vlỽynyded gyn|no hynny ef a weles yna.
yr aỽr y denessaaỽd galaath attaỽ. Ac yna ef a|gyuodes yn|y
eisted ac a|dywaỽt. Grassaỽ duỽ ỽrth galaath gwas iessu grist ~
mi a|vum yr ys|talym y|th aros di. kymer vi rỽng dy dwylaỽ
a|gat ym orffowys rynthunt*. Pan gigleu galaath yr yma+
draỽd hỽnnỽ. ef a|eistedaỽd ỽrth benn y gỽely. ac a|e kymerth
attaỽ. a|r brenhin yna a|ogỽydaỽd rỽng y dỽylaỽ ynteu ar y dw+
yvronn. Ac yna y brenhin a|dywaỽt. Marchaỽc iessu grist heb
ef ỻyma vi gỽedy kaffael yr hynn y bum yn|y damunaỽ yr|ys
talym. ac am|hynny vy arglỽyd yn|yr aỽr honn erbyn vy yspryt
attat. kanys nyt esmỽythach gennyf varỽ yn|ỻe yn|y byt noc
yman. Ac yr aỽr y daruu idaỽ efo gỽneuthur y wedi veỻy.
prouadỽy vu gỽneuthur o duỽ gymeint a|gỽarandaỽ y wedi.
kanys ar hynny yd aeth y eneit o|e|gorff yrỽng dỽylaỽ galaath.
Ac yna ỻawen vu baỽp o|r vanachlaỽc ỽrth galaath pan wybu+
ant panyỽ efo oed yno. Ac yna ỽynt a|wassanaethassant y corf
yn anrydedus ac a|e cladyssant. ac yno y bu galaath deudyd. ac
yn|y trydyd dyd ef a|gychwynnaỽd ymeith. ac a|varchockaaỽd
| « p 102v | p 103v » |