LlGC Llsgr. Peniarth 11 – tudalen 112r

ac ovyn heuyt vot duỽ wedy ỻidiaỽ ỽrthym an hebryngu. Myn vy

ỻỽ heb·yr arthur. nyt oes gennyf|i chweith ewyỻys y wneuthur da

nac ehalaethder. na|dim oc eỻit y drossi ar enryded. namyn vy medỽl

yssyd wedy trossi ar wander a|chrydder caỻon. ac am|hynny y colleis vy

marchogyon. ac y peỻassant vy milwyr y ỽrthyf a|charyat vyng|ke+

dymdeith·yon. Arglỽyd heb y vrenhines. pei elut ti parth a|chapel

seint augustin. yr hỽnn yssyd yn|y ỻannerch wenn. Ac ny dichaỽn

neb damweinyaỽ ar y capel hỽnnỽ onyt trỽy anturyaeth. Mi a|de+

bygỽn y trossei ytt ewyỻys da ar|dy|dyuodyat drachevyn. kanys

nyt aeth yno dyn eiryoet ac anghynghor arnaỽ. ny chynghorei

duỽ ef kynn y dyuot drachevyn os gỽediei o gaỻon da. Arglỽy+

des heb ynteu arthur minneu a|af yno kanys mi a|giglef dys+

tolyaethu hynny yn|wir. a|m medỽl inneu yssyd ar|hynny yr ys

tri di·warnaỽt. Arglỽyd heb y vrenhines. y capel yssyd beriglus

ac anturyus. Eissyoes y|mae yno yn trigyaỽ y gỽr santeidyaf o vren+

hinyaeth gymry. a|e gudugyl yssyd yn ymyl y capel. ac nyt oes

idaỽ vuched onyt a|del y gan duỽ. Arglỽydes heb·yr arthur reit yỽ

ym vynet yno. a|hynny vy hun ac yn aruaỽc heb neb y·gyt a|mi.

Arglỽyd heb hitheu ti a|eỻy gymryt gyt a|thi vn o|r gwyreeingk.

Arglỽydes heb ynteu nys gaỻaf ac nys ỻyfassaf. kanys po mỽ+

yhaf a|dyckit yno o dylwyth. mỽyhaf uydei o anturyeu ac o|ỽrth+

wyneb idaỽ. kanys y|ỻe yssyd beriglus. arglỽyd heb hitheu ti a

dygy gyt a|thi vn ac ny daỽ ytt o hynny namyn|da. arglỽydes

heb ynteu yn|ỻawen. ac oblegyt duỽ minneu a|wnaf hynny. Ac  ̷

yna kyuodi y|uyny a|wnaethant o|r ffenestyr. Ac edrych a|wnaeth

ef o bop parth idaỽ. Ac arganuot gỽas ieuangk teg gaỽns oed y

henỽ.