LlGC Llsgr. Peniarth 11 – tudalen 227r

ni pa|delỽ y dichaỽn ef rymyaỽ y ereiỻ pryt na aỻei y ner  ̷+

thau e|hun. ef a|vu walchmei heb ỽy yn|y gynnuỻeitua a|r

tỽrneimant a gỽybyd di yn ỻe gỽir na bu yno varchaỽc urdaỽl

waeth noc efo. A phan|gigleu meliot y chwedleu hynny ef

a|ymchoelaỽd dra|e|gevyn. ac arthur a gỽalchmei o|r|tu araỻ

a|gychwynnassant o|r pebyỻ. a marchogaeth a|wnaethant

gyntaf ac y|gaỻyssant parth a|r ỻe yr|oed yn eu|bryt vynet. ac

yn|chwannaỽc ganthunt pei|clywynt chwedleu y ỽrth laỽnslot.

a cherdet a|wnaethant yny doethant y|r ty atueiledic y|r ỻe y du+

gassei y bitheiat gynt walchmei. yn|y ỻe y gỽelsei ef y march+

aỽc urdaỽl a|daroed y laỽnslot y lad. ac yno y ỻettyassant ỽy

y nos honno. ac yd oed yno varchogyon vrdolyon yn eu hadna+

bot. Y wreic bioed y ty a anuones y|r wlat gennadeu y geissy+

aỽ. ac y dywedut bot yno y·gyt a|hi y rei a notteynt lad eu ke+

dymdeithyon ar hyt y fforestyd. Eissyoes gỽeỻ oed gan y wreic

pei laỽnslot a|vei yno. kanys ef a ladyssei y braỽt. Yno y doeth+

ant ỻawer o varchogyon yr gorthrymu arthur a gỽalchmei. Y

wreic eissyoes a vu kyn|gỽrteisset ac na odefaỽd gỽneuthur yno

chỽeith drỽc udunt. Seith marchaỽc a|doethant drỽy gedernit

maỽr y gadỽ y bont. hyt nat oed fford y arthur nac y walchmei

y vynet ymeith. onyt eynt dros benneu eu gwewyr. 

T Raethu y mae yr ystorya honn dyuot o laỽnslot o|r di+

nas tlaỽt a|marchogaeth ohonaỽ yny doeth y fforest.

yn|yr|honn y kyuaruu meliot ac ef yn drist ac yn af·lawen

am y chwedleu a|glywssei y ỽrth walchmei. Laỽnslot yna a|o+

vynnaỽd idaỽ o|ba|le yd oed yn|dyuot. ac ynteu a|dywaỽt mae