LlGC Llsgr. Peniarth 11 – tudalen 241r
Ystoriau Saint Greal
241r
a|r meirch yn tramkỽydaỽ y·danunt. a|e ỻygeit yn disserennu.
Ac yna tynnu cledyfeu a|wnaethant ỽy a|dyuot bop vn yn er+
byn y gilyd megys ỻewot. ac ymguraỽ a|wnaethant yny oed
y tan yn neityaỽ o|e helymeu. ac ar|hynny elinaus o|r ty atuei+
lyedic a|doeth tu ac att laỽnslot yn nerth y vriant pan neitya+
ỽd lucanus vỽtler yn|y erbyn. a tharaỽ elinaus a|e waeỽ yny
vyd drỽy y daryan ac yn|y vreich. ac yna lucanus a ysglyffya+
ỽd y ffrỽyn ar vedyr y anuon yng|carchar pan doeth tylwyth
briant a|e amdiffyn. Y vrỽydyr a|barhaaỽd yn hir y·rỽng bri+
ant a laỽnslot. kanys ỻidiaỽc oed bop vn ỽrth y gilyd onadunt.
ac yn enwedic ỻidiaỽc oed vriant. kanys briwaỽ a|wnathoed
yn|drỽc. a ỻaỽer o|e waet yn coỻi. ac amyl oed y niuer. a|phob
vn a ymauaelaỽd a|e|gilyd onadunt ar|vedyr eu daly. eissyoes
y kedernit o bop parth a|e ỻesteiryaỽd. Ac ueỻy y parhaaỽd
yr ymlad y·ryngthunt yny gỽahanaỽd y nos ỽynt. ac o|r
diwed ny aỻaỽd briant gael y gỽare goreu na|e ludyas y|r
ỻeiỻ. kanys laỽnslot a|oed yn mynet a|phedwar o varcho+
gyon briant a|hynny yn vriwedic yng|karchar. heb y re+
i a|drigyaỽd ar y maes. Briant o|r ynyssed ac elinaus a
doethant drachevyn yn|doluryus. ac yn|drist am eu ke+
dymdeithyon a|dalyssit ac a|ladyssit. a laỽnslot a|e gedym+
deithon a|doethant dracheuyn drỽy lewenyd y gaer ỻion.
ac a|dywedassant panyỽ donyaỽc vu udunt a chadarn dy+
uotyat laỽnslot yny delei arthur adref. y marchogyon ~
| « p 240v | p 241v » |