LlGC Llsgr. Peniarth 190 – tudalen 66
Ystoria Lucidar
66
a phob medyant na|da na drỽc vont.
Odyna y dywedir. Nyt oes vedyant o·nyt
y gan duỽ. ef a|uenyc hagen uchot pa+
ham y keiff y rei drỽc vedyant weitheu
a|r rei da weitheu ereiỻ. discipulus Beth a verny
di y|r neb a|wertho neu a bryno teilyng ̷+
daỽt. Magister Y neb a|e pryno. ef a|a. ygyt a sy+
mon magus yng|kyvyrgoỻ uffernaỽl.
ac a|e gỽertho ef a|daỽ clafri ar y eneit
ygyt a|gyezi. discipulus A vyd mỽy gan duỽ go+
brỽy y brelatyeit noc y ereiỻ. Magister Y rei a|vo
ragor arnunt o deilyngdaỽt eglỽyssic
yman. megys esgyb neu offeireit. os ỽynt
a dysgant y bobyl o eir ac o angreifft. y
geniuer eneit a Jachaer drỽydunt ỽy y
geniuer gobrỽy a gaffant ỽynteu yn ra+
gor rac ereiỻ. megys y dywedir. ỽynt
a gynhỽyssir ym medyant eu hoỻ da.
os ỽynteu a|tynn geir Jechyt y gan y
rei yssyd ydan eu medyant. ac a|e tywys+
syo ỽynt y ogof angheu drỽy angreiffteu
dybryt.
| « p 65 | p 67 » |