LlGC Llsgr. Peniarth 45 – tudalen 127
Brut y Brenhinoedd
127
Ac gỽedy eu dyuot ger bron y brenin. A ragor
oed ar y deu uroder oed tywyssogyon ar y
lleill O pryt a gosged a thelediỽrỽyd. Ac gỽe+
dy edrych arnadunt o|r brenin. Gouyn a|wnaeth
pỽy oedynt. A pha dayar y magyssit erni. A
phy achos yr dothoedynt y teyrnas ef. Ac y+
na yd attebaỽd hengist idaỽ dros y|gedymdeith+
on Canys doethaf oed a phrudhaf. Ac ual hyn
yd attebaỽd. O titi uonedicaf o|r brenhined yng
gỽlat saxonia yn ganet ni ac yn magỽyt
un yỽ honno y wladoed germania. Achos yn dy+
uodedigaeth niheu* yỽ rodi yn gỽrogaeth yti
neu y tywyssaỽc da arall. a wnel da in. Ac nyt
oes achos yn gỽrthlad ni on gỽlat; Onyt a|dy+
wedaf ui yti. Gỽlat uechan gyuyg yỽ a
phan amlahont y pobyl mal na anhont yndi
kynnullaỽ a|wneir holl ieuengtit y wlat rac bron
y tywyssogyon a bỽrỽ prenneu ryngtunt a me+
gys y del y coelbren udunt yd ellyngir y wla+
doed y byt y myỽn llongeu y geissaỽ gossym+
deith. Ac yr aỽrhon arglỽyd heb ef yd amyl+
haỽys kyỽdaỽt yndi yny uu reit ethol y ieu+
engtit a wely ti ger dy bron. A niheu* y deu
uroder a wely ti yn tywyssogyon arnadunt
Canys o lin brenhined yd henym. Sef yỽ
uy enỽ i. Hengist. a hors yỽ enỽ uym braỽt
| « p 126 | p 128 » |