LlGC Llsgr. Peniarth 45 – tudalen 133
Brut y Brenhinoedd
133
AC yn|yr amser hỽnnỽ y doeth Garmon es+
gob. A lupus trocens y pregethu geir
duỽ yr bryttaneit. Canys llygredic oed y
cristonogaeth er pan dothoed y paganeit yn
eu plith. Ac gỽedy pregethtu* o|r gwyrda
hynny yd atnewydhaỽyt fyd ym plith y bry+
ttanneit. Canys beth bynhac a|dywettynt ar
y tauaỽt. wynt a|e kedernheynt trỽy peunyd+
aỽl wyrtheu a wnai duỽ yrdunt. Ac gỽedy
rodi y uorỽyn yr brenhin. y dywaỽt hen+
gist ual hyn. Miui heb ef yssyd megys
tat maeth yti. Ac o bydy ti vrth uyng kyg+
hor i. Ti a orchyuygy dy holl elynyon trỽy
uy nerth i am kenedyl. Ac ỽrth hynny Goho+
dỽn ettwa offa uy mab attam. Ac ossa uyg
keuynderỽ Canys ryuelwyr da ynt. A dyro
udunt y gỽladoed yssyd y rỽng y mur a dei+
uyr. ac wynt a|e kynhalant rac estraỽn ge+
nedyl mal y gellych titheu cael yn hedỽch
o|r parth hỽn y humyr. Ac uuudhau a|wna+
eth Gortheyrn y hynny. Ac yna yd anuones
hyt yn germania. Ac y doethant Offa ac ossa
a cheldric a|thry chan llong gantunt yn
llaỽn o uarchogyon aruaỽc. A hynny oll a ar+
uolles Gortheyrn. Ac a urdỽys o rodyon ma+
ỽrweirthaỽc. Ac y·uelly eissoes peunyd yd ych+
| « p 132 | p 134 » |