Llsgr. Caerdydd 1.363 (Hafod 2) – tudalen 188r
Brut y Brenhinoedd
188r
e gwydyat ef bot medraỽt endy. ac ar cledyvev
egory fford vdvnt. ac en dyannot mynet|trostỽ+
nt a gwneỽthỽr trystaf aerỽa onadvnt. kanys
en e lle e dygwydvs er eskymỽnhaf vradwr.
hỽnnỽ medraỽt a llawer o vylyoed y gyt ac ef.
Ac eyssyoes yr henny ny ffoassant er rey ereyll
namyn o|r holl ỽaes emkynnỽllaỽ y gyt. ac en he+
rwyd ev glewder keyssyaỽ ymkynhal a Gwrthỽ+
ynebv y arthỽr. Ac wrth henny gyrattaf a chre+
ỽlonhaf aerỽa a wu er·rygthvnt o pob parth en
ev bydynoed en ssyrthyaỽ. Ac ena o parth medravt
y ssyrthyassant. cheldryt. ac elaffyvs. egberynct.
brynygg. o|r ssaysson. O|r gwydyl. Gyllapadryc. Gy+
llamor. Gyllasel. Gyllamwry. O|r escottyeyt ac o|r
ffychtyeyt oll hayach ac wynt ac ev harglwydy. Ac o pleyt
arthvr e ssyrthyassant. Odbrynct brenyn llychlyn.
Echel brenyn denmarc. kadwr llemenyc yarll
kernyw. kasswallaỽn. a llawer o ỽylyoed y gyt ac
wynt. ac o|r brytanyeyt. ac o kenedloed ereyll a
dvgessynt y gyt ac wynt. Ac|enteỽ er arderchavc
vrenyn arthỽr a vrathwyt en angheỽaỽl ac a dw+
cpwyt odyna hyt en enys aỽallach y yachaỽ y we+
lyoed. Coron teyrnas enys prydeyn a kanhya+
dvs y cvstennyn vap kadwr yarll kernyw y kar
| « p 187v | p 188v » |