Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 83r
Ymborth yr Enaid
83r
a oruc y|braỽt drỽy wylofein am ardangos idaỽ
y|mab a|vei hysspyssach no hynny. Ac yn|ebrỽyd
wedy hynny nachaf y kylyỽ y|braỽt yn arafber
ymadraỽt yn dyỽedut vrthaỽ. dyret llyma dan+
gos y|mab ytt. Ac yn|y lle nachaf y|gỽlei* yn|y|dis+
gleirlathyr eglurloyỽ oleuni paladyr. ar|eilun
mab dyn anueitraỽl diuessur dragyỽydolder
serch maỽred eglurder y berfflaỽn degỽch megys
yn oet deudeg|mlỽyd val yd|oed y gỽynnvydic ar+
glỽyd iessu grist yn|yr amsser y|dechrevaỽd dysgu
yn|y temyl. Ac yn|mynychwanegu amrafael dis+
gleirder tegỽch karueidserch o|e beffyrloygo+
chyonn ganneitlỽysson devrud hyt nat oed neb
ryỽ greadur o|r|a|e gỽelei a allei arnaỽ na|syrthei
yn|y varỽleỽyc o|dra|serch a|thra diruaỽr garyat
ar|y|perffeithgỽbyl anrydedus dỽyỽaỽl degỽch hỽn+
nỽ ac nyt ryued. kannys tragyỽydaỽl uuched.
Ac annorffen vyỽyt anteruynedic yỽ edrych ar
y|dỽyỽaỽl deilyngserch wyneb hỽnnỽ. A chynny
allei neb ryỽ greadur gynnal yn|y gof na|e ve+
dỽl milkannvet rann disgleirder yr eiryanlathyr
degỽch a|oed arnaỽ eissoes kymeint ac a allaỽd
y|braỽt y gynnal gantaỽ ef yn|y vedỽl o adurbryt
y|nefuaỽluab hỽnnỽ a|e arderchaỽclun. llyma yỽ
hyt y gallaỽd ef hynny. o|e gynnal.
| « p 82v | p 83v » |