Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 89r
Ymborth yr Enaid
89r
o|th holl nerthoed yn vn wed a|phei|bydei ef yn gor+
fforaỽl yrỽg y|vreicheu yny glyỽych o nerth y|ser+
chaỽl garyat hỽnnỽ y|ryỽ ber verỽindeb yn|y gi+
ev ar gwytheu. Ac ar hyt yr holl gnaỽt. ac yn|y
mynỽgyl megys golusgyon o|dileeu mel kynn+
teit. Ac yn|y galonn megys digrifserch waryeu
yn peri idi megys pergaroli neu|perhopyein o
nerth digrifỽch y|per annỽylserch garyat hỽnnỽ.
Ac yna gỽybyd y|mae manwrychyon yr yspryt
glan a dyỽetpỽyt vchot y|ry|uot yn ysgeinnyaỽ
o ardyrchafyat gỽefuussev y|kyssegredic vab y+
syd yn dyuot y|th vynỽgyl. A|th|dỽy|vronn. Ac
y|mae manwlith yr yspryt glan a|dyỽetpỽyt vry
y|ry|uot yn gwanegu megys mandagreu o|e ru+
dellyon lygeit ysyd yn dyuot y|th galonn. Ac ym+
dyro yn vỽy vỽy yr per garyat hỽnnỽ drỽy dy+
gynlut ymwasgu ar karyat vab. kyt boet traha+
us y|neb vedylyaỽ ymwasgu ac ef. eissoes coffa
vot yn vỽy y kar y serchaỽl drugared ef ymwas+
gu a|thidi y|th garu. noc y gellych di vedylyaỽ
ymỽasgu a|e garu ef. Ac yna coffa yn hyspys na
throho dy|vedỽl ar neb ryỽ beth knaỽtaỽl. nac
ar dim arall onyt arnaỽ ef e|hun. a hyt y|gellych
lutaf galỽ ar|yr eneweu dirgeledigyon hynn
drỽy y gỽir serchaỽl adoli yn dy vedỽl. a chredu
| « p 88v | p 89v » |