Rhydychen, Llsgr. Coleg yr Iesu 57 – tudalen 132
Llyfr Blegywryd
132
thystolyaeth hi e|hun yn|y ỻe hỽnnỽ. Y neb a
dycko treis ar wreic. y hamobyr a|e dirỽy a|dal
y|r arglỽyd. ac y|r wreic y tal y sarhaet a|e heng+
wedi a dilysrỽyd. Os gỽadu a vynn y gỽr. ac
os kadarnhaa y wreic yn|y erbyn. kymeret
hi y galy ef yn|y ỻaỽ assỽ idi. a|r ỻaỽ deheu ar
ar* y|creir. a|thynget ry dỽyn treis o·honaỽ ef
arnei hi. ac ueỻy ny chyỻ dim o|e hyaỽn.
Y neb a|watto treissaỽ gỽreic. rodet lỽ deng
wyr a deugeint. neu dirỽy treis. Nyt oes yng
kyfreith howel da yspadu gỽr yr treissaỽ gỽ+
reic. Tri achaỽs ny chyỻ gỽreic y hengwedi
kyt adaỽho y gỽr. o glafri ac o eisseu kyt. a
dryc·anadyl. Teir|gỽeith y keiff gỽreic y|hỽy+
nebwerth. Kyntaf y keiff chỽeugeint. Yr eil+
weith punt. Y dryded weith y dichaỽn adaỽ
y gỽr. a mynet a|e hoỻ dylyet genthi. ac os
diodef hi dros y dryded weith. ny cheiff wyneb+
werth. Ony wna morỽyn a uynno o|e chowyỻ
kynn y chyuot y bore o|e gỽely y ỽrth y gỽr.
| « p 131 | p 133 » |