LlGC Llsgr. 3035 (Mostyn 116) – tudalen 162r
Brut y Tywysogion
162r
adeu a oruc gruffud at y|brenhin y geissaỽ hedỽch y gantaỽ
a|r brenhin a|e kymerth ef y|hedỽch drỽy dalu idaỽ dreth vaỽr
ac ymchoelut a oruc y brenhin y loegyr. ac erchi ẏ ẏwein dẏuot
gyt ac ef a dywedut idaỽ y talei idaỽ a vei gyfyaỽn. a dywe+
dut ỽrthaỽ hyn a dywedaf it mi a|af y|normandi. ac o deuy di
gyt a mi a gywiraff it pop peth o|r a dyweis* it. a mi a|th wnaaf
yn varchaỽc urdaỽl. a chanlyn y brenhin a waaeth* drỽy y
mor. a|r brenhin. a kywiraỽd idaỽ pop peth o|r a edewis idaỽ
Y|vlỽydyn rac ỽyneb yd ymhoelaỽd y brenhin o normandi
ac ywein vab kadỽgaỽn gyt ac ef. ac y bu varỽ Jeffrei es+
cob mẏnẏỽ. ac yn|y ol ynteu y deuth gor* o|normandi yr hỽn
a|elwit bernart. yr hỽn a drychafỽyt yn escob y|mynyỽ y
gan henri vrenhin o anuod hoỻ yscolheigon y brytanyeit
gan eu trymygu. Yg kyfrỽg hyny y deuth gruffud vab
rys vab teỽdỽr brenhin deheubarth o Jwerdon y dyfet
yr hỽn a athoed yn|y vabaỽl oetran gyt a rei o|e gereint
hyt yn iwerdon. ac yno y|trigyaỽd yny vu ỽr aeduet. ac y+
n|y diwed wedy diffygyaỽ o dra|hir aỻtuded yd ymchoelaỽd
y dref y|dat. A hỽnnỽ a drigyaỽd amgylch dỽy vlyned
weitheu gyt a geraỻt stiwart casteỻ penuro y daỽ gan y
whaer. hono oed nest verch rys vab teỽdỽr gỽreic eralt ysti+
wart. Gỽeitheu ereiỻ gyt a|e gereint. gỽeitheu yg|gỽyd
gỽeitheu yn aỽsen o le y le. Yn|y diwed y|kyhudỽyt ỽrth
y brenhin. a|dywedut bot medỽl paỽb o|r brytanyeit gyt
ac ef drỽẏ y|ryuygu o vrenhinyaỽl vedyant henri vrenhin.
a phan gigleu ruffud y|chwhedleu* hyny aruaethu a|wna+
eth ar vynet at ruffud vab kynan y geissaỽ amdiffyn y
hoedyl. a gỽedy anuon kenadeu ef a|edewis o deuei attaỽ.
| « p 161v | p 162v » |