LlGC Llsgr. 3035 (Mostyn 116) – tudalen 39v
Brut y Brenhinoedd
39v
fneit kyuoeth kyn no hẏnẏ. Mỽy boen yỽ genyf. i. yr aỽr+
honn coffau vyg kyuoeth a|m anryded yn|yr anser*
hỽnnỽ yn yr hỽn yd oed y|saỽl can mil o varchogẏon
y|m damgylchynu yn kerdet ygyt a mi. Pan vẏdẏn
yn ymlad a|r kestyỻ ac a|r dinassoed. Ac yn anreith+
aỽ kyuoeth vyg|gelynẏon no diodef y|poen ac|achenoctit
a|wnaeth y gỽyr hyny ym. i. y|rei a|uydynt yna dan
vyn traet. och. vi a|dỽyweu nef a|dayar pa bryt y|daỽ
yr amser y gaffỽyf i|talu elchwyl yn|y gỽrthỽneb y|r
gỽyr hynẏ Och cordeila vyg|karedic verch mor wir
yỽ dy ymadraỽd teu di pan dywedeist|i panyỽ ual
y bei uyg gaỻu a|m medyant a|m kyuoeth a|m jeu+
egtit panyỽ ueỻy y karut ti uiui. Ac ỽrth hẏnnẏ
tra vu vyg kyuoeth. i yn gaỻu rodi rodyon paỽb
a|m karei. Ac nyt mi a gerynt namyn vy rodyon
a|m deuodeu a|m donyeu. Ac ỽrth hẏnẏ pan gilỽys
y rodyon y|foes karyat. Ac ỽrth hyny pa furuf y|gaỻaf
rac kewilyd a·dolỽyn nerth na channorthỽy y genyt
ti ỽrth ry sorri yg|kam ohonaf. i. ỽrthyt. ti. am dy|doeth+
ineb di a|th rodi yn dremygedic gan dybygu bot
yn|waeth di|diwed no|th whioryd y|ỻeiỻ A thitheu yn
weỻ ac yn doethach noc ỽyntỽy. Kanys gỽedy a rodes. i.
o|da a|chyuoeth udunt hỽy y gỽnaethant hỽy vi·vi yn
aỻtut o|m gỽlat a|m kyuoeth ac yn ychenaỽc Ac y+
dan gỽynaỽ y|aghyfnerth a|e ofut yn|y wed honno
ef a|dodeth* hyt yg karis y|dinas yd oed y verch yn+
daỽ. Ac anuon amylder o anercheu y uerch y dywe+
dut y|ryỽ a·ghyfnerth a gyuarfu ac ef A gỽedy dy+
wedut o|r genat nat oed namyn ef a|e yswein.
Sef a|wnaeth anuon amylder o eur ac aryant
| « p 39r | p 40r » |