LlGC Llsgr. 3035 (Mostyn 116) – tudalen 4r
Ystoria Dared
4r
wed y|hatebỽẏs pop vn a|pha|wed y|traethyssei baỽb
amdanaỽ ynteu ac ef a anoges y briaf y|dilit hỽy
drỽẏ ymladeu ỽrth na ỽydynt hỽy dim o|e ewyỻus
ef. ac yna ar hẏnt priaf a erchis galỽ y veibon
attaỽ a|e hoỻ getymdeithon. Nẏt amgen noc antenor
ac anchiges ac eneas ac vlcolonca a|pholidamantem
a|phantum a lampetem a|e hoỻ veibon a anyssit idaỽ
o|e orderchadeu. a|phan deuthant hỽy ygyt ef a|dẏ+
waỽt ỽrthunt idaỽ anuon antenor yn genat y
roec y|o·vyn iaỽn y|r rei a ladysynt y dat ac erchi
edrẏt esonia e|chwaer idaỽ. ac na|chaỽssei antenor
dim o|e negesseu namyn y|waratwydaỽ ac anuon
ohonaỽ ynteu yn|y eireu ony|mynynt hỽy|wneuthur
y ewyỻus ef gỽelet bot yn iaỽn idaỽ anuon ỻu
maỽr y|roec. a|phoeni y neb a dylyei y|boeni hẏt
nat aruerei wyr groec o giwilydyaỽ gỽyr troea
ac anoc y veibon a|wnaeth priaf y vot yn dywys+
sogyon o|r ymlad hỽnỽ ac yn penaf ector kanys
ef a oed hynaf o|e veibon ac yna y dywaỽt ector
y|mynei ef dial ewyỻus y|dat ac am ageu y|hen+
dat pa ryỽ gameu bynac a|wnaethoedit y|wyr
troea o|bleit gỽyr groec y|mynei ef eu dial ac
ef a dywaỽt vot yn ofyn arnaỽ na eỻynt dỽyn
y|r pen yr hyn a vedylyassant ỽrth|uot ỻawer
o ganhorthỽyodron y|wyr groec rac ỻaỽ a gỽyr
y|ymlad yn da yn europa. a bot gỽyr yr asia yn+
teu yn ỻesc yn ymladeu ac ỽrth hyny nat oed
haỽd kael ỻyges. ac odyna alexander a dechrewis
anoc paratoi ỻyges a|e hanuon y|roec a|chymryt
a|wnaeth ef arnaỽ y|vot yn dywyssaỽc ar|y|ỻyges
| « p 3v | p 4v » |