LlGC Llsgr. 3035 (Mostyn 116) – tudalen 67r
Brut y Brenhinoedd
67r
ar y deu vroder. Gratian. a valaỽnt. a oedynt amher+
odron yn rufein. A gỽedy ỻad y|neiỻ y deholes y|ỻaỻ
o rufein ymdeith.
A c yn yr amser hỽnnỽ yd oed wyr freinc a gỽas+
gỽyn a|pheitaỽ yn ryfelu ar kynan meiradaỽc
a|r brytanyeit ereiỻ a oed yn ỻydaỽ drỽy vy+
nych ymladeu. Ac ynteu yn ỽraỽl ac yn ỽychyr yn
ymdiffryt ac yn ymgynhal rac·dunt|ỽy gan dalu
aerua dros y gilyd. Ac yna gỽedy hedychu y·rygtunt
Medylyaỽ a oruc kynan keissaỽ o|e gytuarchogyon
o wraged dylyedaỽc ỽrth hilyaỽ plant a gynhalei
y|wlat a|r kyuoeth yn dragywẏdaỽl. Ac val na bei
neb kyfathrach y·rygtunt a|r freinc na chymysc
yn|y genedyl namyn eu bot yn jaỽn vrytan·y+
eit Sef a|wnaeth kynan anuon ar|dunt vrenhin
kernẏỽ y erchi y verch yn wreic idaỽ ef. kanys
honno yd oed yn|y charu yn vỽyaf gỽreic herwyd
y boned a|e dylyet a|e phryt a|e gosged a|e diweir+
deb. Ac y am hynnẏ erchi idaỽ a oruc kynan drỽy
y ỻythyreu kynuỻaỽ a vei wedỽ o verchet dyly+
edogyon ynys prydein ỽrth eu rodi y dylyodogyon
ynteu. A chynuỻaỽ mỽyaf a aỻei eu kaffel o|wra+
ged gỽedỽ ereiỻ a vei is eu breint no|r rei hynẏ
ỽrth eu rodi yn ỻydaỽ y|r kyfryỽ ac a|dylyhynt
Sef oed yr* dunaỽt hỽnnỽ. braỽt y garadaỽc y gỽr
a|dywespỽyt vchot Ac a dothoed yn ỻe y vraỽt
yn vrenhin. A|phenadur heuyt oed yn ynys pry+
dein. kanys idaỽ y gorchymynassei vaxen ỻywo+
draeth ynys brydein pan aeth o·heni a|hyt
tra vei ynteu odieithyr yn gỽneuthur y gỽaryeu
hẏnnẏ
| « p 66v | p 67v » |