LlGC Llsgr. 3036 (Mostyn 117) – tudalen 192
Brut y Brenhinoedd
192
oed ynteu yna ar lan y mor yn arhos dyuotediga+
eth cheldric tywyssaỽc a llu gantaỽ o germania.
yn borth udunt. A guedy dyuot baldỽlff hyt ar
dec milltir y| ỽrth y| gaer. medylyaỽ a| wnaeth dỽyn
kyrch nos am pen arthur a|e lu. Ac nyt ymgelỽys
hynny eissoes rac arthur. Sef a oruc ynteu. anuon
kadỽr tywyssaỽc kernyỽ a chwechant marchaỽc
gantaỽ a their mil o pedyt y| raculaenu y fford y te+
bygynt eu dyuot. A guedy caffel o gadỽr gỽybot
y fford y| doynt. dỽyn kyrch a oruc am eu pen. Ac
eu guascaru Ac eu kymhell ar ffo. A diruaỽr tristit
a goual a gymyr baldỽff yndaỽ ỽrth na allỽys gell+
ỽg y| uraỽt o|r guarchae yd oed. A medylyaỽ a| wnaeth
py wed y gallei kaffel kyffuryf y ymdidan a|e vra+
ỽt. kanys ef a tebygei y keffynt holl ryddit a gua+
ret. pei keffynt kyffuryf ygyt ystrywyaỽ beth a
wnelhynt am hynny. A guedy nat oed fford amgen
Sef a| wnaeth eillaỽ y pen a gỽneuthur diwyll ere+
styn arnaỽ. A chymryt telyn yn| y laỽ a| cherdet trỽy
pebylleu arthur gan ymdangos yn erestyn. A gue+
dy na thebygei neb ỽrthaỽ y uot yn| tỽyllỽr mal yd
oed. Sef a oruc dynessau parth ar gaer y chweric y
dan ganu y telyn. A guedy y adnabot o|r rei guarch+
aedic ef. Sef a wnaethant estynnu raffeu idaỽ. Ac
ỽrth y rei hynny y tynnu y myỽn attunt. A guedy
guelet o·honaỽ y vraỽt. mynet dỽy laỽ mynỽgyl
yn vn furyf a chyn kyuottynt o ueirỽ. A guedy
| « p 191 | p 193 » |