LlGC Llsgr. Peniarth 46 – tudalen 344
Brut y Brenhinoedd
344
bei a|gynnydei beth idi ỽedy hynny. Ereill
a gollei hynny eilỽeith. a doluryus yỽ gen+
nyf ych gỽannder. canys un genedyl ym. a
bryttannyeit yn gelỽir mal chỽitheu. a|r
ỽlat a|ỽelỽch chỽi yma yd|ym ni yn|y ham+
diffynn yn ỽraỽl rac estraỽl* genedyloed.
A |Gỽedy daruot y|Selyf dyỽedut yn|y
ỽed honno. yd attebaỽd catỽallawn y|r
brenhin yn|y ỽed honno. arglỽyd hep
ef duỽ a|talo it adaỽ nerth ymi y|geissaỽ
uyg|kyuoeth dracheuen. a minheu a|e diol+
chaf os gallaf. Yr hynn a|dyỽedy ditheu
am lesged y bryttannyeit yn amdiffynn
ynys. prydein. nyt reit ryuedu hynny herỽyd y|te+
bygaf|i. Sef achos yỽ hynny. dylyedogyon
y|teyrnnas oll a|duc y|gỽyr a|dyỽedeist|i hyt
y|ỽlat honn. a|phann gauas yr anyledogy+
on medyant ar yr ynys yn|lle y|gỽyr bon+
hedic. ymdyrchauel a|ỽnaethant hỽy yg
kam syberỽyt yn uỽy noc y canhattaei y
dylyet. ac o ormodyon kyuoeth a|golut y
ymrodi y|odinab megys na|chlyỽspỽyt y|ky+
ffelyp yn|y byt. ac yn bennaf y|peth a|distryỽ
| « p 343 | p 345 » |