Caergrawnt, Llsgr. Coleg y Drindod O.7.1 – tudalen 33r
Llyfr Blegywryd
33r
weith. kanys o genedylyaeth elyny+
aeth yỽ. Dros ouyssyaỽ y telir sarha+
et heb drychafel. Dros cussan; trayan
y sarhaet a uyd eisseu. cany bu weith+
ret cỽbyl y·rydunt. nac o tỽylloueint
idi na phy wed bynhac y rodet y cussan.
Y neb a gussano gỽreic gỽr arall; ta+
let petwared ran y sarhaet. Ac uelly
o ouyssyaỽ. onyt yg|gỽare raffan. neu
yg|kyfedach. neu pan del dyn o pell.
y neb a wnel cỽbyl weithret. cỽbyl sar ̷+
haet a tal. Gronỽy ab moric a dywe ̷+
dei na dyly gỽr yr bot gan wreic gỽr
arall. Ar wreic yn da genti talu dim
idaỽ tra ganmolho hi y gỽeithret. A
or byd honneit y gỽeithret. y wreic
a dyly talu y sarhaet yr gỽr. neu y
gỽr ae gỽrthotto hi yn ryd. Or dỽc
gỽr wreic yn llathrut. A mynet ygyt
a hi y ty vchelỽr. kymeret yr uchelỽr
uach y gan y gỽr ar holl iaỽn y wreic
kyn no chyscu ygyt o·honunt. Diffeith
brenhin y dywedir uot morỽyn. Ac
ỽrth hynny y dyly y brenhin y gobyr.
| « p 32v | p 33v » |