LlGC Llsgr. 24049 (Boston 5) – tudalen 89
Llyfr Blegywryd
89
vraỽt falst rỽg dadleuwẏr a|godef ẏ|vra+
ỽt ohonunt ẏnn|ẏ llẏs. A guedẏ hẏnnẏ
rodi braỽt iaỽn ohonnaỽ ẏ|myỽn dadẏl
gẏffelẏb. talet ẏ|r brenhin camlỽrỽ. dros
ẏ vraỽt ffalst a|rodes gẏnt. Kannẏs e|h+
un megẏs tẏst credadỽẏ a|dangosses o
aỽdurdaỽt iaỽn rẏ|dorodi ohonnaỽ vr*+
ỽt gam kẏn|no hẏnnẏ. O|R dẏrẏ braỽ+
dỽr cam vraỽt ẏn erbẏn dẏn nẏ allo
trỽy gẏureith ac ef ẏmỽystlaỽ am|ẏ
gam vraỽt. namẏn o|r dichaỽn ef dan ̷+
gos ẏna. neu ẏn oet pẏmthec niwar+
naỽt trỽẏ lẏureu kẏureith ẏn erbẏn
ẏ|braỽtỽr braỽt teilẏgach ẏn ẏscriue+
nedic. ẏ|teilẏgaf a seif idaỽ. a|r braỽdỽr
a gẏll camlỽrỽ. TRi dẏn nẏ allant ẏm+
ỽẏstlaỽ ẏn erbẏn braỽt trỽẏ gẏurei ̷+
th; Vn ẏỽ. brenhin lle nẏ allo herỽẏd
kẏureith seuyll ẏ|mẏỽn dadẏl gẏrbron
braỽdỽr ẏn holi. neu ẏ atteb trỽẏ vre+
int anẏanaỽl. neu trỽẏ vreint ẏ|tir.
mal breẏr. neu arall. Eil ẏỽ; dẏn egl+
ỽẏssic rỽẏmedic ẏn urdeu kẏssegre+
dic. Trẏdẏd ẏỽ; dẏn eglỽẏssic rỽẏm+
edic ẏg|kreuẏd. Kannẏ dichaỽn neb
herỽyd kẏureith rodi gỽẏstẏl ẏn erbẏn
| « p 88 | p 90 » |