Rhydychen, Llsgr. Coleg yr Iesu 57 – tudalen 256
Llyfr Blegywryd
256
yn ỻaỽ yr hynaf o|r gỽyr. a rodi o hỽnnỽ cus+
san idaỽ. ac ueỻy o laỽ y laỽ hyt att y diỽe+
thaf. O·ny byd penn·kenedyl. un gỽr ar|hu+
geint o|oreugỽyr y genedyl. a chymryt y
mab o|r|gỽr a|vo yn ỻe arglỽyd erbyn y laỽ
deheu. a|e rodi yn|ỻaỽ yr hynaf o|r gỽyr hynny
a|rodi o·honaỽ cussan idaỽ. a|e gymryt ohon+
aỽ erbyn y laỽ deheu a|e rodi yn ỻaỽ yr|eil|gỽr
nessaf idaỽ. ac o laỽ y laỽ hyt y gỽr diwethaf.
Herỽyd gỽyr powys. ony byd na|that na
phenkenedyl. dengwyr a|deugeint a|e kym+
er. ac a|e gỽatta. O|deruyd y dyn wneuthur
cam yn|y kymỽt yd hanffo ohonaỽ. a|e|daly
yn|y gymỽt e|hun. diwyget yno y cam a|wnel.
O deruyd gỽneuthur cam o dyn yn|y gym+
ỽt e|hun. a|e daly yng|kymỽt araỻ. anuoner
ef y gymỽt e|hun. y ymdiffỽyn am y cam a
ry wnathoed. O deruyd y dyn wneuthur cam
yn|y kymỽt yd* hanfo ohonaỽ. ymdiwyget a|r
dyn y gỽnel y cam idaỽ. o|r deily ef yno. a|bit
y dirỽy a|r camlỽrỽ y raclaỽ y|kymỽt yd hanffo
| « p 255 | p 257 » |