LlGC Llsgr. Llanstephan 4 – tudalen 24v
Buchedd Dewi
24v
nedyl o|r pysgaỽt. ac megys y rodes duỽ
pennadur yn|y daear ar yr adar. veỻy
y rodes ef dewi yn|bennadur ar y dynyon
yn|y byt hỽnn. Ac yn|y mod y rodes duỽ
Matheus yn iudea. a lucas yn alexandria.
a christ yg|kaerussalem. a phedyr yn ru+
uein. a martin yn freingk. a sampson
yn ỻydaỽ. y rodes y dauyd sant vot yn
ynys brydein. Ac ỽrth hynny y gỽnaeth+
pỽyt dewi sant yn bennadur ac yn|dyw+
yssaỽc ar seint ynys brydein. am bre+
gethu o·honaỽ yn|y sened vaỽr honno
y|r hoỻ bobyl yn|yr honn ny aỻaỽd neb
pregethu namyn efo. A|r|dyd hỽnnỽ
hoỻ seint yr ynys honn a|r|brenhined
oỻ a|ostyngassant ar eu|glinyeu y adoli
y dewi. ac a rodassant idaỽ vot yn ben+
naf o seint ynys brydein ac ef a|e haed+
aỽd. a|r dyd hỽnnỽ y rodet y dewi y
noduaeu. ac amdiffyn y bop kyfryỽ
dyn o|r a|wnelei drỽc o|r a|ffoei y noddir
dewi. Honn yỽ nodua dewi y baỽp o|r
a|vo yn|dinas rubi yn naỽd dewi ac y+
dan y amdiffyn o|r|byd reit idaỽ. kennat
yỽ idaỽ vynet o dyui hyt ar deiui. ac
o|r byd reit idaỽ uynet a|vo mỽy aet yn
| « p 24r | p 25r » |