LlGC Llsgr. 3035 (Mostyn 116) – tudalen 41r
Brut y Brenhinoedd
41r
A gỽedy marỽ kuneda y|doeth rywaỻaỽn y vab ynteu
yn|y ol. Ac yn oes y|gỽr hỽnnỽ y bu y glaỽ gỽaet ac
y|bu varỽ y|dẏnẏon gan y|kactỽn* yn eu ỻad drỽy
y|glaỽ gỽaet. Ac yn ol hỽnnỽ y doeth gorỽẏst Ac yn ol
hỽnnỽ y|doeth seissyỻ Ac yn ol seissẏỻ. Jago vab gorust
ẏ|nei ynteu Ac yn ol Jago y|bu kynuarch vab seissyỻ
Ac yn ol kynuarch y doeth goronyỽ digu. Ac y|hỽnnỽ
y|bu deuy vab. porrex a fernex. A|gỽedy marỽ eu
tat y|kyuodes teruysc yrygtunt am y vrenhinaeth
a|cheissaỽ o porrex ỻad fernex o vrat. A gỽedy gỽebot
hẏnẏ o|feruex fo hẏt yn|freinc A|dyuot a|phorth y|gan
suardus vrenhin freinc Ac ymlad a|porrex y vraỽt
Ac yna y|ỻas a|r gynuỻeitua a doeth gantaỽ. A gỽedẏ
gỽybot o|r vam ỻad y mab. Sef a|wnaeth keissaỽ
ỻad y|mab byỽ yn ỻe y marỽ A gỽedy kaffel oheni
ef yn kysgu yd aeth hi a|e morỽyn a|e lad. Ac yna ẏ
ranỽyt yr ynys yn pump ran drỽy duundeb y gỽyrda.
A c ym|pen wers y|kyfodes gỽas clotuaỽr. Sef
oed y enỽ dyfynwal moel mut mab klydno
tywysaỽc kernyỽ A gỽedy marỽ klydno a|chaf+
fel o dyfynwal y|kyuoeth ryuelu a|wnaeth ar pymer
vrenhin ỻoegẏr A gỽedy llad pemer y|duunassant
yn|y erbẏn. Neidaỽc vrenhin kymry ac stater
vrenhin y gogled a|dechreu ỻosgi kyuoeth dy+
fynwal a|e anreithaỽ A|dyuot a wnaeth dyfyn+
wal a dec mil o|wyr aruaỽc gantaỽ yn eu her+
bẏn a|rodi kat ar vaes udunt A gỽedy gỽelet o
dyfynwal hỽyret yd oed yn kaffel y vudugolyaeth
dỽyn attaỽ wechcanỽr o|r gỽyr deỽraf idaỽ a oruc
a|gỽisgaỽ amdanunt arueu y|gỽyr a|ladyssit oc eu
| « p 40v | p 41v » |