LlGC Llsgr. Peniarth 18 – tudalen 31v
Brut y Tywysogion
31v
gunt ynn aruaỽc. Adaỽ y|lle hỽnnỽ a|oruc. A|chi+
lyaỽ hyt y|lle a elỽit kil yỽein. Ac yna kynnull+
aỽ a|oruc y|brenhin y lu ygyt a|mynet hyt yn
rudlan. Ac yna y|pebyllaỽd yỽein yn hal llỽynn
pina. Ac odyno yd argyỽedei ef yr brenhin dyd
a nos. A madaỽc ap maredud arglỽyd pỽys a
deissyuaỽd lle idaỽ y|bebyllu. rac llu y brenhin
a|llu yỽein ual y gallei erbynnyeit y kyrchev
kynntaf a|ỽnelei y|brenhin. Yg|kyfrỽg hynny
y|dyblygaỽd llyges y|brenhin y|von. A gỽedy a+
daỽ yn|y llogeu y gỽyr noeth diaryf. ar gỽassa+
naethỽyr. y|kyrchaỽd tyỽyssaỽc y|llogeu. A|phenn+
llogỽyr ygyt ac ef. Ar Jeuegtit adas y|ymlad+
deu yr ynys y|myỽn. Ac yspeilaỽ a orugant e+
glỽys ueir. Ac eglỽys beder a|llaỽer o|eglỽysseu
ereill. Ac am hynny y gỽnaeth duỽ dial arnunt
kanys trannoeth y bu brỽydyr y rygtunt a gỽyr mon. Ac
yn|y vrỽydyr honno y kilyaỽd y|ffreinc herỽyd
y gnotaedic deuaỽd ỽedy llad llaỽer onadunt
a|dala ereill. Abreid y|dieghis ychydic onadunt
yr llogeu ỽedy llad henri uap henri vrenhin.
A chann mỽyhaf holl bennaduryeit y|llogeu.
A gỽedy daruot hynny y|hedychaỽd y|brenhin
ac yỽein. Ac y|cauas cadaỽaladyr y|gyuoeth
dracheuen. Ac yna yd ymhoelaỽd y brenhin
y loegyr. Ac yna yd ymladaỽd ioruerth goch ap
| « p 31r | p 32r » |