LlGC Llsgr. Peniarth 35 – tudalen 16r
Llyfr Cynog
16r
idaỽ yr ymadraỽd a dywetter yn| y ỽyd. Nyt
gỽybydyat namyn y| dyn a| welho yn| y ỽyd yr
hyn a dotter yn| y penn. llỽ keitweit yỽ kyme+
int ac a dotto y gynghaỽs yn eu penn. Tygu bot
yn wir pob pỽnc. llỽ y gỽybydyeit yỽ. Gwe+
let a gỽybot yr hyn a| dotter yn eu penn. llỽ tyst
yỽ ry tystu idaỽ gynt yr hyn y mae yn| y tyngu.
[ llỽ gỽr not yỽ y| gyfryỽ ac a tyngho y llofrud
[ llỽ llofrud yỽ gwadu hyt y| gyrher arnaỽ
[ llỽ reithỽr yỽ bot yn tebycaf gantaỽ bot yn
wir yr hyn a| tỽng. Nyt oes
lys ar keitweit. Reit yỽ eissoes uot keitweit
yn adỽyn. Pỽy| bynhac a holo da kyfnewit
holet trỽy uach. Pỽy| bynhac a holo da trỽy
edewit. holet trỽy uri duỽ. Pỽy| bynhac a ho+
lo da trỽy ammot. holet o amotwyr. Pỽy| byn+
hac a holo da trỽy echwyn neu o uenffic neu o
adneu neu lunyeith a wnel yg gỽyd kyhoed
holet trỽy ỽybydyeit. Ny ellir dodi gỽybydy+
eit ar alanas. Nac ar sarhaet nac ar
waet. a gweli nac ar fyrnicrỽyd. Nac ar
kynllỽyn. Nac ar losc ty. Nac ar ledrat. Nac ar
uach. Nac ar kyrch godeuaỽc. Nac ar odinap. Nac
ar treis. Nac yn lle y dylyho keitweit uot. Nac yn
un lle y bo reith ossodedic yg kyfreith. Sef achos yỽ
Cany dyly gỽybydyeit diffodi reith. a
| « p 15v | p 16v » |