LlGC Llsgr. Peniarth 45 – tudalen 185
Brut y Brenhinoedd
185
heb ganhyat. Ac anuon y erchi idaỽ
dyuot y wneuthur iaỽn yr brenin. Canys
un o|e sarhadeu yỽ adaỽ y lys heb gan+
nyat. Ac gỽedy nat ymchoelei yr
neb. Tygu a|wnaeth y brenin. trỽy
lit. yd anreithei kyuoeth Gorleis
a heb ohir kynnullaỽ llu maỽr a
wnaeth y brenin. A chyrchu kernyỽ;
a llosgi y dinassoed ar kestyll. Ac er
hynny ny lauassỽys Gorleis ymer+
byn ar brenin. Canys llei oed y niuer
noc un y brenin. Sef a wnaeth ef Cada+
rnhau y kestyll ac y·uelly arhos porth
attaỽ o iwerdon. A chan oed mỽy y of+
al am y wreic noc ymdanaỽ e hun. y
gossot hi a wnaeth ef yg castell tinda+
gol ar glan y traeth yn|y lle cadarn+
haf yn|y kyuoeth. Ac ynteu a aeth
e hun yg castell dimlot. rac y caffel
y gyt o dryc damwein. A phan gigleu
y brenin. hynny. Mynet a wnaeth yn+
teu partha* ar castell yd oed Gorleis
yndaỽ. a|dechreu ymlad ac ef. A|e kyl+
chynu mal na chaffei neb dyuot oho+
naỽ. Na mynet idaỽ. Ac gỽedy mynet
vythnos heibaỽ. Coffau a wnaeth uthur
| « p 184 | p 186 » |