LlGC Llsgr. Peniarth 46 – tudalen 102
Brut y Brenhinoedd
102
ny allỽys y bryttannyeit. namyn ky+
mryt eu ffo. ac yn agos udunt yd oed
mynyd carregaỽc. a|llỽyn coet ym·penn
y|mynyd. ac hyt yno y|foes casỽallaỽn.
a|e lu ỽedy eu dygwydaỽ yn|yr rann ỽa+
ethaf o|r ymlad. a gỽedy cael goruchel+
der y|mynyd o·nadunt. gỽrthỽynebu
udunt yn ỽraỽl hep eu gadu y|dringyaỽ
ar eu torr. a|heuyt serchet y|mynyd a|e
dryssỽch. a|e gerryc oed amdiffynn y|r
bryttannyeit. ac yn gỽneuthur my ̷ ̷+
nych aeruaeu oc eu gelynyon. Sef a
oruc ulkassar yna. gossot y|lu ygkylch
y|mynyd rac dianc neb o|r bryttanny+
eit odyno. canys y uedỽl oed y kymell
y|brenhin y|darestỽg idaỽ trỽy neỽyn.
yr hỽnn ny allassei y kymell trỽy ar ̷+
ueu ac ymlad. O anrydeued genedyl
y bryttannyeit a|gymhellassant y gỽr
hỽnn dỽyỽeith y|ffo. yr hỽnn ny allỽys
yr holl vyt gỽrthỽynebu idaỽ. ac ỽynt
| « p 101 | p 103 » |