LlGC Llsgr. Peniarth 46 – tudalen 276
Brut y Brenhinoedd
276
nu y|dileu hyt ar dim. ac ual yd oed gỽedy
ymrodi y|creulonder yn erbyn y|bopyl hynny
n·achaf esgyb. ac offeireit y|ỽlat honno tru+
an yn|troetnoeth. ac esgyrn Seint. a|chrogeu
yn dyuot y|ỽediaỽ trugared arthur dros y ̷
truan bopyl honno. a|gỽedy adoli ar|tal eu deu+
lin. adolỽyn gadu udunt y|rann uychan oed
gantunt o|r|ynys gann tragyỽydaỽl geithi+
ỽet ydanaỽ ynteu. a|chyffroi a|oruc arthur
ar|ỽarder a|rodi y|r gỽyrda hynny y|hadolỽyn.
a gỽedy daruot hynny. edrych a|ỽnaeth hyỽ+
el uap emyr llydaỽ anssaỽd y|llynn. a|ryue+
du y|saỽl auoned a|doi idaỽ. ac na redei oho+
naỽ namyn un. a|r saỽl ynyssed. a|r kerric
a|r saỽl nythot eryrot. ac yna y|dyỽat ar+
thur ỽrthaỽ. bot llynn arall yn|y ỽlat honno
oed uỽy anryued no hynny. Sef ansaỽd yd
oed. ugein troetued oed yn|y hyt. a|phump
yn|y dyfnet a hynny yn pedrogyl. a phedeir
kenedyl o|byscaỽt yn|y pedeir cogyl. ac ny
cheffyt byth un o rei hynny yn rann y|gi+
lyd. namyn paỽb yn|y rann e hun. ac y|mae
| « p 275 | p 277 » |