Breudwd Rhyddiaith Gymraeg 1300-1425
English

Llsgr. Amwythig 11 – tudalen 80

Ysbryd Gwidw

80

achos hẏnnẏ ẏd adolẏgeis gan duỽ caffel ẏm+
didan a hi val ẏ gallei ỽneuthur cỽbyl iaỽn
dros ẏ pechot. Prior. bẏ hẏt o amser ẏ bẏdẏ ti
ẏma. Gwidw. hẏt ẏ pasc nessa. Ac onẏ chlẏỽch
chỽi vi ẏmma gỽẏbẏdỽch vẏ erbẏnneit ẏ
nef. Prior. bẏ rẏỽ penẏt ẏdỽẏt|i ẏn|ẏ diodef
Gwidw. flam o tan. Prior. gỽrthỽẏneb ẏ dẏỽedẏ
o achos tan yssẏd corfforaỽl val na dichon
poeni ẏsprẏt. Gwidw. o vẏ|mraỽt drỽc ẏdỽẏt ẏn
deall ẏr ẏscruthur lan bonẏt ẏdiỽ ẏr ẏscry+
thur ẏn tẏstolaethu trỽẏ gẏfẏaỽnder a
gallu duỽ vot tan vffernaỽl ẏn|y kẏthre+
uleit mal pan dẏỽetto eỽch chỽi bobẏl vell+
tigetic ẏ|r tan dragỽẏdaỽl dros aỽch pecho+
deu. Prior. pẏham ẏnteu nat ẏdiỽ ẏ tẏ hỽn
ẏn llosci. Gwidw. o vẏ|mraỽt bẏchan o deall ẏs+
syd ẏnot i bonẏ ỽelẏ ti ẏ lluchet ẏn discẏn
ac nẏt ẏdẏn ẏn llosci onẏ|s mẏn duỽ a
phonẏd|ẏdiỽ ẏr heul ẏn trẏỽanu ẏ gỽẏdẏr
heb ẏ|waethau vellẏ ẏr bot ẏ flam ẏ|m llosci