LlB Llsgr. Ychwanegol 19,709 – tudalen 38v
Brut y Brenhinoedd
38v
eudaf a|r teyrnas genthi y vaxen mab ỻywelyn. a|phan
welas kynan meiradavc hẏnnẏ blyghau a oruc a ỻidy ̷+
av a|mynet parth a|r alban. a chynnuỻaỽ ỻu diruavr
a|ryuelu ar uaxen. ac a|r ỻu hvnnv gantav dyuot
drvy humyr ac an·reithav y gvladoed hẏnnẏ o|pop
parth idav. a gvedy menegi hẏnnẏ y vaxen. kynuỻav
a|oruc maxen y ỻu mvyaf a aỻvys a|mynet yn er+
byn kynan. a rodi kat ar vaes idav a|e yrru ar fo.
ac eissoes ny pheidvys kynan. namyn kynuỻav y
lu eilweith ac anreithav y gogled yn|y gylch val kynt
a gveitheu gan vudugolyaeth a gỽeitheu hebdi yd ym+
choelynt vaxen a|e wyr y vrthav. ac o|r diwed eissoes
gvedy gvneuthur o|pop vn goỻedeu mavr y gilyd
kymodi a|orugant drvy eu ketymdeithon a dyuot
yn vn garyat. ~
A c ym pen yspeit pump mlyned syberwau a oruc
maxen o amylder eur ac aryant a sỽỻt a|mar+
chogẏon. ac yn|y ỻe paratoi ỻyges a|wnaeth a|chynuỻ+
av attav hoỻ ymladwyr ynys. prydein. ac a aỻvys ẏ gaffel
o leoed ereiỻ. a gvedy bot pop peth yn baravt. kychwyn
a|oruc parth a ỻydav y|wlat a elwir brytayn vechan yr
avr·hon. a gvedy y dyuot idi dechreu ymlad a|r bobyl
a oed yndi o freinc. ac yn|y diwed y|ỻas himbalt eu tẏ+
wyssavc. a|phymtheg mil o|wyr aruavc y·gyt ac eff
a gvedy gvelet o vaxen meint oed yr aerua onadunt
a gvybot bot yn havd gvedy hynnẏ eu darestvg yn gvlyl*
Galv kynan meiradavc a|wnaeth attav ac y·dan chverth+
in dywedut vrthav val hynn ar neiỻtu y vrth y bydinoed.
| « p 38r | p 39r » |