LlB Llsgr. Cotton Titus D IX – tudalen 74v
Llyfr Blegywryd
74v
Hyt aỽst; wyth a deugeint a|tal. Hyt gal+
an wheuraỽr; deudec a deugeint a|tal. ac
yna allỽeith vyd. a hynn a|dyrcheif
arnaỽ yna hyt galan mei; pedeir ke+
innaỽc kyureith. ac yna triugeint
a|tal. ac|yna ych cỽbyl vyd. CRoenn
ych; deudec keinnaỽc a|tal. CRoen bu+
ch. wyth geinnaỽc a|tal. Teth buch;
pedeir keinnaỽc kyureith. Cornn|buch
a|e llygat. a|e|llosgỽrnn. pedeir keinnaỽc
kyureith yỽ gỽerth pob vn ohonunt.
Gỽerth dant eidon. neu dant march tom.
pedeir keinnaỽc kyureith yỽ. O|R gỽer+
th dyn vuch y|arall. a|bot teth yr* vuch yn
diffrỽyth. gỽerth y|teth a|tal pob blỽyd+
ynn idaỽ ytra vo y|uuch ar|y|helỽ. Deu+
geint a|tal eneit buch. neu ych. Dros
y croen. wyth geinnaỽc. Dros y|petỽar
wharthaỽr. wyth geinnaỽc. Dros y|pen.
a|r|traet. a|r amyscar. a|r|gỽer. pedeir
keinnaỽc. Buch a|uyd taladỽy o|e heil
llo hyt y|pymhet. Ych o|r tryded ieu hyt
y whechet. Y neb a|ỽertho buch. neu ych.
ef a|dyly vot dros tri chleuyt. Rac y|de+
ra tri dieu a|their nos. Rac yr ysgyue+
int tri mis. Rac y|pelleneu vlỽydynn.
| « p 74r | p 75r » |