Llsgr. Caerdydd 1.363 (Hafod 2) – tudalen 99r
Brut y Brenhinoedd
99r
AC gwedy kaffael o ortheyrn e wudvgolyaeth ar
gorỽot trwy nerth e saysson ef ar rodes amrava+
lyon rodyon en amyl vdvnt. ac y heyngyst eỽ tewys+
saỽc er rodes llawer o tyr a dayar en lyndesey megys
e galley kynhal y varchogyon y gyt ac ef ac eỽ go+
ssymdeythyaỽ. Ac odyna heyn megys ed oed ef gwr kall
estrywys a doeth gwedy kaffael ohonaỽ ef kytem+
deythas a charyat e brenyn dywedwyt a orvc enteỽ
en e wed honn wrth e brenyn. Arglwyd ep ef my a w+
elaf de elynyon ty en ryvelỽ arnat o pob parth yt. ac
echydyc o|th kywdaỽtwyr hevyt y|th karỽ. kanys pa+
ỽb o·nadvnt esyd en bygythyaỽ dwyn emreys wledyc
o lydav a|th vurỽ ty o|r vrenhynyaeth a|e vrdaỽ entev
en vrenyn. Ac wrth henny o ryng bod y ty envynvn
kennadeỽ ym gwlat y a gwahodvn marchogyon o+
dyno ac achwanegvn en nyver wrth emlad. Ac ỽn
peth o bey da kenhyt ty a archỽn pey na thebygvn
vy nackaỽ o·honavt. Ac ar henny e dywaỽt gorth+
eyrn. Anỽon ty de kennadev hyt en germanya a g+
wahavd e nep a ỽynnych. ac arch y mynnheỽ er hy+
nn a damvnych ac ny thomedyr. Ac ar henny est+
wng y penn a orỽc heyngyst a thalỽ dyolchdredeỽ
maỽr ydaỽ. Arglwyd ep ef ty am kyvoethogeyst
| « p 98v | p 99v » |