Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 111v
Ystoria Adrian ac Ipotis
111v
iessu gyntaf. Sef yỽ hynny yn|y dechreu yd oed y
geir. Sef oed hynny yn|y tat duỽ yd oed mab. kanys
geir duỽ oed y|vab. a|chyt ar geir yd oed y|tat ar
mab. ar yspryt glan ar teir person yn|y drindaỽt
ac yn vn enỽ. ny digaỽn yr vn ohonunt vot y|ỽrth
y|gilid. Yr amheraỽdyr a|dyỽat yna. o vab tec ti
a|vuost yn|y nef. bysaỽl nef ysyd y|holl gyuoetha+
ỽc duỽ. seith nef y|maent. Ac yn|y nef goruchaf
ysyd. y|mae y|drindaỽt o nef y|tat ar mab ar ys+
pryt glan yn teir person val y|dyỽepỽyt* vchot.
Ac ny digaỽn neb lleyc na yscolheic dyall y|lleỽe+
nyd ysyd yno. Yr eil nef ysprydaỽl yỽ ysyd dan
rad is no hỽnnỽ. a|diogel yỽ yt. neb dyn na diga+
ỽn dyỽedut y|lleỽenyd ysyd yno. hyt pann yspeiler
o|e lleỽenyd dydbraỽt. Ar trydyd nef a leỽycha val
kristal yn llaỽn o|velyster lleỽenyd damunedic.
o achỽysson perigloryon ach confessoryeit yn gỽa+
ssanaethu duỽ hollgyuoethaỽc. Y|petỽeryd yỽ.
euraỽl nef yn llaỽn o|vein arderchogyon rinỽe+
daỽl. a|phlas gossodedic yỽ yg|kyfeir gỽinon. A|th+
lodyon. yn|y lle y|mae goleuni heb tyỽyllỽch tra+
gyỽydaỽl. Y pymhet nef yỽ. hirveith a|llydan o
dynyolyaeth dỽyỽaỽl. a|phei na bei y|diodeifeint
ef a|e dynyolyaeth neur athoed y byt yg|kyfyr+
goll. Y hỽechet nef yỽ. yr eglỽys catholic yn|y
| « p 111r | p 112r » |