Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 143v
Gwlad Ieuan Fendigaid
143v
ar colofneu hyt pann delher ar un. a|hynny gan
ysgynnv y|vynyd megys yd ymlaaỽyd gynt yn|ys+
gynnv hyt ar y|pedeir ar trugein. y colofneu ha+
gen ar basseu o vn ryỽ genedyl vein gỽerthua+
ỽr ynt. Ar graddeu yr ysgynnir drỽydunt yn
goruchelder. y|golofyn uchaf y|mae discỽylua yn
ossodedic o ryỽ geluydyt radlaỽn hyt na eill neb
yn|yr hollre tir ysyd darystyngedic yn ni. gỽneu+
thur dim yn hollaỽl na thỽyll na brat. na|chyf+
arỽydon yn yn erbyn ni. neu y|rei einym ni.
na ỽelher o|r disgỽylua honno yn amlỽc ac eu
hadnabot pỽy vont na pheth a|ỽnelhont. ef a
vyd yn ỽastat yn cadỽ y|discỽylua honno teir
mil o|ỽyr aruaỽc dyd a nos rac o|damỽein gallu
y|thorri nev y bỽrỽ yr llaỽr. Pob mis yn|y vlỽy+
dyn ef a|uyd seith brenhin yn gỽassanaethu yni
pob vn ohonunt yn|y vrdas. Ac o tyỽyssogyon deu
a|deugeint. O ieirll vn ar|bymthec a|deugeint.
a|thrychant. y|ryfedi hỽnnỽ a|uyd yn ỽastat ar
yn bort ni heb y|rei a|uo gossodedic ynn ymrauae+
lon ỽassannaethu yn yn llys ni. Ar yn bort ni y
bỽyttaant beunyd ar yn deheu deudec archescob
ac ar y|llaỽ asseu vgein escyb. a|phedriarch o|r lle
y|mae bed thomas ebostol. ar gỽr ysyd yn lle pab.
| « p 143r |