Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 85v
Ymborth yr Enaid
85v
na braswynnyon vordỽydyd kadyrweith. A|chyng+
grynnyon linnyev y·rygtunt. a|hirwynnyon
vnyawnllun esgeireu kyfuaddlinn eithyr vot
yn vreisgach y krotheu vdunt yn|agos ar|y|glin+
nyev nogyt eu meined. Ac ydan hynny tynery+
on hirwynnyon traet. a chyngrynnyon vyssed
arnunt gwynndesdlusson. Ac odyna tynerder
yr|holl ysprydaỽl gnaỽt desoluslathyr kymeredic
o|r yspryt glan. a gwynnvydic anedic o|veir wyry
yn kyfulawni kyfladyat pob ffydlaỽnn gnaỽt.
Ac ef o dragywydaỽl garyat annỽylserch. Ac
am|y mab serhaỽcuryt hỽnnỽ yd|oed y|kyfryỽ honn.
nyt amgen. peis. a|hossaneu o|r ystinos teneu
claerwynn. Sef yỽ yr|ystinos. maen gỽerthua+
ỽr claerwynn. ac a|geffir yn|yr yspaen eithaf. ac
a|ellir y|nyddu. a gwneuthur gỽiscoed o|r adaued
hỽnnỽ. Ar wisc a|wneler ohonaỽ a|olchir yn|y tan
pann vvtraho. a|byth y|para. ac a|elỽir vryael.
kannys vr o efrei. tan yỽ o|gymraec. a|botymev
o|eur perffeithgoeth ar bop llaỽes o ardỽrnn hyt
ym pennelin a|rudem gỽerthuaỽr ym|pob bỽtỽm.
Ac velle yd|oed ar|y|dỽy|uronn o|e elgeth hyt y|wre+
gys. A|chrys a|llaỽdyr o|r|bissỽn meinwyn amdanaỽ.
Sef yỽ y|bissỽn. meinllin o|wlat yr eifft. Ac esgittyeu
o|r kordỽan purdu yn arỽydockav y|dynyaỽl gnaỽt.
| « p 85r | p 86r » |