LlGC Llsgr. Llanstephan 27 (Llyfr Coch Talgarth) – tudalen 20v
Ystoria Lucidar
20v
megys y gỽelir bot yn gamgylus y neb a glywo ỻawer y ỽrth
duỽ ac nyt ufudhao idaỽ. veỻy y gỽelir bot yn diargywed y|r
neb ny chigleu dim y ỽrth duỽ. ac o|r achaỽs hỽnnỽ ny wnaeth
idaỽ dim gỽassanaeth. a dynyon a grewyt yr gỽassanaethu
o·nadunt y creaỽdyr. drỽ·y garu y kyff nessaf herỽyd
anyan. megys y|dywedir. Na|wna dim y araỻ onyt a
vynnut y ty hun. ny mynn neb letratta arnaỽ. na dỽyn
y gymar na|e lad. ỽrth hynny na|wnaet ynteu hynny y
araỻ. a|phan dremycko dynyon eu kyfnessafyeit yn|y ryỽ
betheu hynny. y maent yn gỽrthỽynebu y|r gỽr yssyd
wir garyat. a|channyt oes gongyl yn|y byt nyt adnaper
duỽ. am|hynny nyt oes esgus. discipulus A dichaỽn y neb ny wypo˄nt
dim y ỽrth duỽ ac a|wnelont a|da a drỽc esgussodi. Magister Y neb
nyt adnapo nyt adnabydir. a|r neb nyt adnapont duỽ o
ffyd a gỽeithret. megys y sarassinyeit. duỽ a|e kyfyrgoỻa
ỽynt megys y elynyon. a|r|neb a grettont y duỽ ac ny wypont
y ewyỻys megys mileinyeit ot aant yng|kyfyrgoỻ ny pho+
enir ỽynt yn orthrỽm. megys y dywedir. Gwas ny wnel ew+
yỻys y arglỽyd ac ef heb y wybot gỽare ffonn vechan a|ge+
iff. Pỽy bynnac hagen drỽy ethrylith a|wypont ewyỻys
duỽ ac ny|s|gỽnelont. megys ysgolheigyon. drudach y poen+
ir y rei hy·nny megys y|dywedir. a|wypo ewyỻys yr arglỽyd
ac ny|s gỽnel gỽare ffynn ỻawer a geiff hỽnnỽ. a phỽy|byn+
nac ny mynnont gỽarandaỽ da. ac a|dremykont dysgu yr
hynn a|dylyont y wneuthur. dỽy boen a|gaffant. vn dros
eu tremyc am bechu ohonunt dan y wybot. Yr eil am wy+
bot dysgu da. megys y dywedir. Y nefoed a|dangossant y
ennwyred.
| « p 20r | p 21r » |