LlGC Llsgr. Llanstephan 27 (Llyfr Coch Talgarth) – tudalen 60r

Jessu grist. ac y|dodet ar y groc. ac y prynaỽd ynteu ni yr creu y

gaỻon. A gỽedy hynny ef a|disgynnaỽd y uffern y ostỽng me+

dyant yr|hoỻ gythreuleit. ac y oỻỽng adaf ac eua o|e rỽyme+

digaeth boeneu yd oedynt yndunt. a|ỻawer o eneidyeu hefyt

nyt amgen dauyd broffỽyt. a moysen. ac abraham benn ffyd. a|r

saỽl oed oỻ dan geithiwet heuyt. ef a|e|kynhỽyssaỽd ym pa+

radwys ỻe y mae ỻewenyd tragyỽyd heb orffen arnaỽ. A

gỽedy kychỽynnu iessu o veirỽ yn vyỽ yd esgynnaỽd ar nefo+

ed. Ac y mae yn eisted ar deheu duỽ dat hoỻgyuoethaỽc yn

wir duỽ ac yn wir dyn. Ac odyna y daỽ dydbraỽt y varnu

ar baỽp herỽyd y weithret priaỽt. ac yna ffol vyd y neb nyt

ovynhao. ac ny bo brydychus erbyn y dyd hỽnnỽ. Y cristono+

gyon buchedaỽl a ant y|r ỻewenyd. a|r rei drỽc eu ffyd a ant

y|r poeneu. ỻyma diỻyngdaỽt tec heb yr amheraỽdyr. Oi a

uab synhỽyraỽl heb ef pa bỽngk y tỽyỻ y kythreul dyn by+

daỽl. ac y harwed yr eneidyeu y uffern. Y mab a|dywaỽt mae

seith bechaỽt. a|ỻuossaỽc ynt ym·plith y knaỽtolyon dynyon.

Kyntaf o·nadunt medỽl drỽc yng|caỻon dyn. A|r eil yỽ ỻad

calaned yn wirion. a hynny a dỽc dyn y|myỽn honnedigaeth

drỽc kewilydyus. ac ony cyffessa hynny yn gỽbyl. ef a a y

eneit y|r budredyon boeneu. Camsyberỽyt yỽ araỻ. glythi+

neb. godineb yỽ vn o|r rei gỽaethaf. Kynghoruynt yỽ pechaỽt

chwennychyaỽl drỽc. ac a dynn yr|eneidyeu y uffernaỽl boeneu.

Yn ystorya baỽl ebostol y mae yn dywedut keluydyt y ỽrth

boeneu uffern. Y gynghoruynt y mae plas e|hun gỽahanret+

aỽl ual ffynhaỽn o bres yn ỻaỽn o grochaneu y erni ac yde+

ni yn ỻosgi yn amlỽc. A phan|gyffroo y byd godỽrd maỽr ual